DAC 7 - Introjtu Ġġenerat minn Bejjiegħa ta’ Pjattaformi Online

Ħarsa Ġenerali Legali:

Waħda mill-emendi ewlenin implimentati permezz tad-DAC 7, hija r-reviżjoni tad-DAC billi jiġu estiżi l-obbligi tal-AEOI għall-Operaturi tal-Pjattaforma Diġitali.  Ir-rekwiżiti ta’ diliġenza dovuta u ta’ rappurtar isiru obbligatorji kemm għall-operaturi tal-pjattaformi tal-UE kif ukoll għal dawk mhux tal-UE, u apparti minn hekk, huwa meħtieġ li tiġi kondiviża ċerta informazzjoni fattwali u finanzjarja tal-bejjiegħa rapportabbli mal-awtoritajiet tat-taxxa fl-Ewropa.  L-Operaturi tal-Pjattaforma Diġitali jinkludu dawk li joperaw Pjattaforma (li jkunu kwalunkwe software, bħal siti web u applikazzjonijiet inklużi applikazzjonijiet mobbli), li jippermettu lill-Bejjiegħa tagħha (li ma jkunux impjegati tal-operatur tal-pjattaforma jew tal-entità relatata tagħha) jikkonnettjaw mal-utenti għall-fini li jwettqu Attività Rilevanti.  It-tipi ta’ “Attività Rilevanti” (kemm domestika kif ukoll transkonfinali), li huma rapportabbli għall-finijiet tad-DAC 7, jinkludu: il-kiri ta’ proprjetà immobbli, il-forniment ta’ servizzi personali, il-bejgħ ta’ oġġetti u l-kiri ta’ kwalunkwe modalità ta’ trasport.

Id-DAC 7 daħal fis-seħħ, meta fil-21 ta’ Marzu 2021, id-Direttiva tal-Kunsill 2011/16/UE (“id-Direttiva dwar il-Kooperazzjoni Amministrattiva”) ġiet emendata mid-Direttiva tal-Kunsill (UE) 2021/514 li testendi r-regoli tal-UE dwar it-trasparenza tat-taxxa għall-pjattaformi diġitali. Id-DAC 7, imbagħad, ġie implimentat fil-leġiżlazzjoni Maltija fl-20 ta’ Jannar 2023, bis-saħħa ta’ AL 8 tal-2023, li emenda L.S. 123.127, intitolata Regolamenti dwar Koperazzjoni ma’ Ġurisdizzjonijiet oħra fuq Kwistjonijiet ta’ Taxxa (Emendi), 2023.

L-emendi l-oħra tad-Direttiva tal-Kunsill 2011/16/UE (“id-Direttiva dwar il-Kooperazzjoni Amministrattiva”) li saru permezz tad-DAC 7 jinkludu:

• kategorija addizzjonali ta’ introjtu (royalties) li għandha tiġi pprovduta fi skambji ta’ DAC 1, il-kunċett ta’ awditi konġunti,
• espansjoni tal-preżenza u l-parteċipazzjoni ta’ uffiċjali tat-taxxa barranin f’inkjesti amministrattivi;
• definizzjoni tat-terminu “rilevanza prevedibbli” għall-fini tal-EOIR u
• regoli ġodda dwar it-talbiet għall-iskambju ta’ informazzjoni għal gruppi ta’ kontribwenti li mhumiex identifikati individwalment. 

Reġistrazzjoni tad-DAC 7:

L-Operaturi tal-Pjattaformi li jissodisfaw il-prerekwiżiti tal-klassifikazzjoni ta’ RMPO, kif stabbilit fit-Taqsima 2.4.1 tal- Linji Gwida b’rabta mal-obbligi ta’ rapportar tad-DAC 7 tal-Operaturi tal-Pjattaformi, għandhom jirreġistraw mal-MTCA permezz ta’ din il- Paġna ta' Reġistrazzjoni

Dawk il-pjattaformi diġitali, li jikklassifikaw lilhom infushom bħala “Operaturi tal-Pjattaforma Esklużi”, xorta jridu jirreġistraw mal-MTCA u jipprovdu prova ta’ tali klassifikazzjoni.

Operaturi tal-Pjattaforma rreġistrati ġodda huma obbligati jirreġistraw mal-MTCA fi żmien ġimagħtejn (2) mill-bidu tal-attivitajiet tagħhom. Dan japplika wkoll għall-Operaturi tal-Pjattaforma Esklużi.

Sottomissjonijiet tad-DAC 7:

L-Operaturi tal-Pjattaformi jistgħu jirreferu għall-ispeċifikazzjonijiet tekniċi elenkati hawn taħt biex jintegraw is-sistemi tal-IT tagħhom fil-portal ta’ rapportar tal-MTCA.

Skadenzi:

RMPO jrid jirrapporta l-informazzjoni stabbilita fir-rekwiżiti tad-DAC 7 lill-Awtorità Kompetenti f’Malta fl-MTCA fir-rigward tal-Perjodu Rapportabbli, fuq bażi annwali u sa mhux aktar tard mill-31 ta’ Jannar tas-sena ta’ wara s-sena kalendarja li fiha l-Bejjiegħ jiġi identifikat bħala Bejjiegħ Rapportabbli.

Linji gwida:

Għal aktar gwida dwar dan ta' hawn fuq, jekk jogħġbok irreferi għal-Linji Gwida b’rabta mal-obbligi ta’ rapportar tad-DAC 7 tal-Operazzjonijiet tal-Pjattaforma (Verżjoni 1.3)

Dettalji ta' Kuntatt

Għal aktar informazzjoni, jekk jogħġbok ikkuntattjana fuq [email protected]