Individwi
Individwi b’Impjieg Indipendenti
Sistema tal-FSS
Pensjonanti
Taxxi tal-Proprjetà
Wirt
Trasferimenti ta’ Ishma
Affarijiet Legali u Tekniċi
Taxxa Korporattiva
Affarijiet Internazzjonali
Sistema tal-FSS
Sħubijiet
Individwi
Negozju
Sistemi Elettroniċi
Dak Kollu li Teħtieġ li Tkun Taf Dwar is-Sisa
Dazju tas-Sisa
Id-Dazju tas-Sisa huwa Taxxa nazzjonali, imposta mill-Att dwar Dazju tas-Sisa – Kapitolu 382 tal-Liġijiet ta’ Malta, fuq ċerti oġġetti u prodotti bażiċi li jiġu kkunsmati jew użati, bħal fil-każ ta’ servizz, f’Malta.
Id-Dazju tas-Sisa huwa impost fuq l-Oġġetti kollha Soġġetti għas-Sisa li jiġu rilaxxati għall-konsum sakemm ma jkunux eżentati legalment iżda irrispettivament minn jekk ikunux prodotti lokalment jew ġejjin minn Stati Membri tal-UE jew minn pajjiżi terzi u jekk id-Dazju tas-Sisa jkunx tħallas qabel fl-Istat Membru tad-dispaċċ jew fi kwalunkwe pajjiż ieħor.
Oġġetti Armonizzati
L-Oġġetti Armonizzati huma soġġetti għad-Dazju tas-Sisa fl-Istati Membri kollha u huma inklużi fid-Direttivi u r-Regolamenti relattivi tal-UE. Dawn il-kategoriji ta’ Oġġetti soġġetti għas-Sisa huma “Alkoħol u Xarbiet Alkoħoliċi” li jinkludu nbejjed u spirti, “Prodotti tat-Tabakk Manifatturati” u “Prodotti tal-Enerġija” magħmula l-aktar minn żjut minerali.
It-tieni, it-tielet u r-raba’ skedi (Armonizzati) huma inkorporati fl-Att dwar Dazju tas-Sisa. Kull skeda, li fiha kategorija differenti ta’ oġġetti soġġetti għas-sisa, hija maqsuma f’żewġ kolonni. L-ewwel kolonna tagħti d-deskrizzjoni tal-oġġett soġġett għas-sisa filwaqt li t-tieni kolonna turi r-rata tad-dazju tas-sisa relattiva.
Oġġetti Mhux Armonizzati
L-Oġġetti Mhux Armonizzati huma dawk il-prodotti bażiċi li huma soġġetti għat-taxxa tas-sisa u huma rregolati mill-istess att u huma kklassifikati fil-Ħames Skeda.
L-Iskedi 5A – 5H, inkorporati fl-Att dwar Dazju tas-Sisa – Kapitolu 382, jiddefinixxu l-Prodotti Bażiċi u s-Servizzi kollha soġġetti għas-Sisa li fuqhom huwa impost id-dazju tas-sisa. Kull skeda, li fiha kategorija differenti ta’ oġġetti soġġetti għas-sisa, hija maqsuma f’żewġ kolonni. L-ewwel kolonna tagħti d-deskrizzjoni tal-oġġett soġġett għas-sisa filwaqt li t-tieni kolonna turi r-rata tad-dazju tas-sisa relattiva.
Persuna fiżika jew ġuridika (jew grupp fiżiku jew ġuridiku ta’ persuni), li jkollha reġistrazzjoni tal-VAT Maltija valida li matul il-kors tan-negozju tagħha tkun tixtieq tinnegozja f’oġġetti soġġetti għas-Sisa taħt arranġament ta’ sospensjoni tad-dazju, inklużi oġġetti soġġetti għas-sisa li hija tirċievi minn barra l-pajjiż, tista’ tirreġistra mad-Dwana bħala Kummerċjant tas-Sisa. Entitajiet barranin jistgħu wkoll jiġu rreġistrati f’Malta bħala Kummerċjanti tas-Sisa jekk ikunu rreġistrati lokalment mad-Dipartiment tal-VAT u jkollhom rappreżentant fiskali f’Malta.
Dawn il-kummerċjanti, wara li jkunu ppreżentaw applikazzjoni lid-dipartiment, issottomettew id-dokumentazzjoni kollha mitluba, għaddew minn eżerċizzju ta’ diliġenza dovuta u pprovdew garanzija, jingħataw l-istatus mid-Dipartiment tad-Dwana biex joperaw jew bħala Magazzinier awtorizzat, Konsenjatarju Reġistrat tas-Sisa, Konsenjatur Reġistrat tas-Sisa jew Kummerċjant Reġistrat tas-Sisa, skont l-Artikolu 10 fl-Att dwar Dazju tas-Sisa.
Maħżen tat-Taxxa
“Maħżen tat-taxxa” tfisser post fejn l-oġġetti soġġetti għas-sisa jiġu prodotti, ipproċessati, miżmuma, riċevuti jew mibgħuta taħt arranġamenti ta’ sospensjoni tad-dazju minn magazzinier awtorizzat fil-kors tan-negozju tiegħu, soġġett għal ċerti kundizzjonijiet stabbiliti mill-Kummissarju.
Magazzinier Awtorizzat
Magazzinier Awtorizzat jista’ japplika għal aktar minn Maħżen tat-Taxxa wieħed. Jekk l-operatur ekonomiku jkun beħsiebu jimporta Oġġetti soġġetti għas-Sisa minn pajjiżi terzi u jżommhom taħt sospensjoni tas-sisa/tad-dazju doganali, il-kummerċjant għandu japplika għal Maħżen Doganali. Huwa jrid ikun ukoll irreġistrat mad-dipartiment, jipprovdi Garanzija Bankarja adegwata u jżomm rekords tal-operazzjonijiet. Kull Magazzinier Awtorizzat u kull Maħżen tat-Taxxa jingħata Numru tas-Sisa uniku u Ċertifikat tar-Reġistrazzjoni. Id-data relattiva kollha tiddaħħal fis-SEED (Sistema ta’ Skambju ta’ Data tas-Sisa) li hija sistema elettronika li tintuża madwar l-UE.
Konsenjatarji Reġistrati
Dawn il-kummerċjanti, għall-kuntrarju tal-magazziniera awtorizzati jistgħu jirċievu biss Oġġetti soġġetti għas-Sisa li jiċċaqilqu taħt arranġament ta’ sospensjoni tad-dazju minn Stat Membru ieħor. Dawn in-negozji ma jistgħux iżommu, jipproduċu, jipproċessaw jew jibagħtu oġġetti soġġetti għas-sisa taħt arranġament ta’ sospensjoni tad-dazju. Huma jridu jkunu wkoll irreġistrati mad-dipartiment, jipprovdu Garanzija Bankarja adegwata u jżommu rekords tal-operazzjonijiet. Madankollu huma jingħataw ukoll Numru tas-Sisa uniku u Ċertifikat ta’ reġistrazzjoni u d-data relattiva kollha tiddaħħal fis-SEED.
Konsenjaturi Reġistrati
Dawn in-negozjanti, għall-kuntrarju tal-magazziniera awtorizzati jistgħu jibagħtu biss Oġġetti soġġetti għas-Sisa taħt arranġament ta’ sospensjoni tad-dazju lejn Stat Membru ieħor malli jiġu rilaxxati għaċ-ċirkolazzjoni libera (jiġifieri d-dazju doganali jiġi saldat). Ma jistgħux iżommu, jipproduċu, jew jipproċessaw oġġetti soġġetti għas-sisa taħt arranġament ta’ sospensjoni tad-dazju. Huma jridu jkunu wkoll irreġistrati mad-dipartiment, jipprovdu Garanzija Bankarja adegwata u jżommu rekords tal-operazzjonijiet li jirrigwardaw tali operazzjonijiet. Madankollu dawn jingħataw ukoll Numru tas-Sisa uniku u Ċertifikat ta’ Reġistrazzjoni u d-data relattiva kollha tiddaħħal fis-SEED (is-Sistema ta’ Skambju ta’ Data tas-Sisa).
Kummerċjanti Reġistrati
Dawn l-operaturi ekonomiċi jridu jkunu kummerċjanti professjonali mingħajr l-istatus ta’ magazzinier awtorizzat. Dan il-kummerċjant jista’, fil-kors tan-negozju tiegħu, jibgħat u, jew jirċievi oġġetti soġġetti għad-dazju tas-sisa, imsemmija fil-Parti B tar-Raba’ Skeda u, fl-Iskeda Ħamsa A, B, C, D, E, F, G, H.
Rimborżi
Ir-rimborżi huma rregolati mill-Att dwar Dazju tas-Sisa Kapitolu 382 tal-Liġijiet ta’ Malta. Dawn jirreferu għall-fjuwil – żejt tal-gass u diżil, ikkunsmat għal skop speċifiku.
Sabiex operatur ekonomiku jew individwu privat, skont il-każ, jikkwalifika għal din l-iskema, hemm ċerti rekwiżiti u proċeduri li jeħtieġ li jiġu segwiti.
Bħalissa hemm żewġ tipi ta’ rimborżi tal-fjuwil li wieħed jista’ japplika għalihom. Fiż-żewġ każijiet il-fjuwil irid ikun jew żejt tal-gass 0.1 Kubrit jew diżil. Il-fjuwil li qed issir referenza għalih irid dejjem jinxtara fi stat li jkun ġie fiżikament imqabbel ma’ żebgħa Ħamra jew Ħadra.
Iż-żejt tal-gass aħmar jista’ jiġi kkunsmat biss għan-navigazzjoni kummerċjali kif deskritt fir-raba’ skeda tal-Att dwar Dazju tas-Sisa. Alternattivament, iż-żejt tal-gass aħdar jintuża speċifikament għal skopijiet ta’ tisħin.
Sabiex operatur ekonomiku jew individwu privat ikun jista’ japplika għar-rimborżi, hemm proċedura fis-seħħ li trid tiġi segwita. Talba formali tiġi sottomessa lid-Dipartiment fejn jintalab lura d-dazju tas-sisa żejjed imħallas fuq il-fjuwil ikkunsmat. It-talba magħmula trid tkun appoġġata mid-dokumentazzjoni meħtieġa, bħal logbooks, fatturi, kif ukoll karti oħra li juru l-konsum tal-fjuwil. Dokumentazzjoni oħra tista’ tintalab ukoll għal kjarifika addizzjonali skont il-każ partikolari.
Status Update
The form was submitted successfully!