DAC 3 - Deċiżjonijiet tat-Taxxa Transkonfinali u Arranġamenti tal-Ipprezzar bil-Quddiem

Ħarsa Ġenerali Legali:

Id-DAC 3 jirreferi għad-Direttiva tal-UE 2015/2376, li tagħti mandat għall-iskambju awtomatiku ta’ informazzjoni dwar deċiżjonijiet tat-taxxa transkonfinali u arranġamenti tal-ipprezzar bil-quddiem (APAs) fost l-awtoritajiet tat-taxxa tal-UE. L-industrija ma għandha l-ebda obbligu speċifiku f’termini tar-rekwiżiti tad-DAC 3, peress li MTCA għandha l-mandat li tiskambja tali deċiżjonijiet mal-Istati Membri rispettivi.

Deċiżjoni tat-taxxa transkonfinali bil-quddiem hija konferma jew assigurazzjoni li l-awtoritajiet tat-taxxa jagħtu lill-kontribwenti dwar kif it-taxxa tagħhom se tiġi kkalkulata f’sitwazzjoni transkonfinali qabel ma sseħħ it-tranżazzjoni. Bl-istess mod, qabel ma jsiru tranżazzjonijiet transkonfinali, APA jiddetermina sett xieraq ta’ kriterji bejn intrapriżi assoċjati (jiġifieri kumpaniji fi grupp) għad-determinazzjoni tal-prezzijiet ta’ trasferiment jew jiddetermina l-attribuzzjoni tal-profitt lil stabbiliment permanenti. Id-DAC 3 b’hekk jespandi l-ambitu tal-AEOI obbligatorja, peress li japplika għal kwalunkwe deċiżjoni transkonfinali bil-quddiem jew APA pprovduti minn Stat Membru u mhuwiex limitat biss għal sitwazzjonijiet intra-UE.  Id-DAC3 jeskludi deċiżjonijiet transkonfinali bil-quddiem mill-AEOI jekk dawn jikkonċernaw u jinvolvu esklussivament l-affarijiet tat-taxxa ta’ persuni fiżiċi.

M’hemm l-ebda divulgazzjoni pubblika tad-data tad-DAC 3, peress li tali informazzjoni tiġi ddepożitata f’bażi tad-data tad-direttorju ċentrali sigura, li hija aċċessibbli biss għall-awtoritajiet kompetenti tal-Istati Membri. 

Id-DAC 3 daħal fis-seħħ, fejn fit-8 ta’ Diċembru 2015, id-Direttiva tal-Kunsill 2011/16/UE (“Direttiva dwar il-Kooperazzjoni Amministrattiva”) ġiet emendata bid-Direttiva tal-Kunsill tal-UE 2015/2376 (“DAC 3”) dwar l-iskambju awtomatiku obbligatorju ta’ informazzjoni fir-rigward ta’ deċiżjonijiet tat-taxxa transkonfinali bil-quddiem u arranġamenti tal-ipprezzar bil-quddiem. Id-DAC 3, imbagħad, ġie implimentat fil-leġiżlazzjoni Maltija fil-5 ta’ Ġunju 2017, bis-saħħa ta’ AL 411 tal-2016, intitolat ir-Regolamenti dwar Koperazzjoni ma’ Ġurisdizzjonijiet Oħra fuq Kwistjonijiet ta’ Taxxa (Emenda). 

Barra minn hekk, ir-regoli għall-iskambju awtomatiku ta’ informazzjoni skont id-DAC 3 huma wkoll konformi mal-iżviluppi internazzjonali u huma bbażati fuq l-Azzjoni 5 tal-OECD tal-Proġett dwar l-Erożjoni tal-Bażi u t-Trasferiment tal-Profitti.