It-Taqsima tat-Tranżitu / Żoni Ħielsa 

Ħarsa ġenerali qasira tal-Proċedura Standard ta’ Tranżitu

It-Tranżitu tal-Unjoni hija proċedura doganali sospensiva li tippermetti li l-merkanzija mhux f’ċirkolazzjoni libera, u dawk il-ftit oġġetti tal-Unjoni li għalihom huwa meħtieġ it-Tranżitu tal-Unjoni, jiċċaqilqu fl-Unjoni Ewropea (UE) filwaqt li tiżgura li kwalunkwe ħlas dovut fuq dawn l-oġġetti fil-pajjiż tad-destinazzjoni tagħhom huma garantiti. Waqt li jkun taħt il-proċedura, il-ħlas ta’ kwalunkwe dazju doganali jew ħlasijiet oħra huwa sospiż.

It-tranżitu tal-Unjoni jintuża wkoll biex jikkontrolla l-moviment ta’ tali merkanzija lejn u minn Andorra, San Marino u t-“territorji speċjali” tal-UE (bħal Channel Islands). Il-proċedura hija estiża biex tkopri l-moviment tal-merkanzija madwar il-pajjiżi tal-EFTA bis-saħħa ta’ konvenzjoni doganali separata u li hija magħrufa bħala “Tranżitu Komuni”.

Preżentazzjoni tad-dokument tad-Dikjarazzjoni ta’ Akkumpanjament tat-Tranżitu (TAD) fl-Uffiċċju tad-Destinazzjoni.

Id-dikjarazzjoni ta’ akkumpanjament tat-tranżitu TAD ta’ merkanzija li tidħol (T1) għandha tiġi ppreżentata flimkien mal-merkanzija intatta fl-uffiċċju doganali tad-destinazzjoni fil-limitu ta’ żmien preskritt (u wkoll bis-siġilli intatti fejn applikabbli).

Status ta’ merkanzija

 Il-merkanzija hija maqsuma f’żewġ kategoriji:

 (a) Oġġetti li għandhom status tal-Unjoni (“merkanzija tal-Unjoni”):
Dawn huma oġġetti li:

• joriġinaw fl-Unjoni jew
• ġew importati minn pajjiż mhux tal-UE u tpoġġew fiċ-ċirkolazzjoni ħielsa (ara hawn taħt) fl-Unjoni jew
• ġew manifatturati fl-Unjoni minn materjali jew partijiet importati minn pajjiż mhux tal-UE, sakemm il-materjali jew il-partijiet importati jkunu f’ċirkolazzjoni ħielsa.

It-terminu "ċirkolazzjoni ħielsa" huwa użat biex jiddeskrivi oġġetti importati li fuqhom ġew imħarsa l-formalitajiet kollha tal-importazzjoni u kwalunkwe dazji doganali jew ħlasijiet oħra tħallsu u ma ġewx rimborsati kollha jew parzjalment. Oġġetti li joriġinaw fl-Unjoni huma wkoll fiċ-ċirkolazzjoni ħielsa sakemm ma tkunx ġiet mitluba rifużjoni tal-esportazzjoni tal-CAP jew rifużjoni oħra. Ġeneralment il-merkanzija tal-Unjoni tista’ tiċċaqlaq fl-UE mingħajr ebda kontrolli doganali.


(b) Oġġetti mingħajr status tal-Unjoni (“oġġetti mhux tal-Unjoni”) Dawn huma oġġetti li:

• joriġinaw minn barra l-Unjoni li fuqhom ma jkun tħallas l-ebda dazju u ma jkun ġie mħares l-ebda formalità ta’ importazzjoni.

It-tipi ta’ moviment ta’ Tranżitu

Hemm żewġ tipi ta’ moviment ta’ tranżitu Komuni/tal-Unjoni:

 (a) Il-proċedura Esterna (T1) tintuża għal:

• oġġetti mhux tal-Unjoni li fuqhom ma tħallsux dazji tal-importazzjoni u
• oġġetti tal-Unjoni soġġetti għal rifużjoni tal-CAP.

(b1) Il-proċedura Interna (T2) tintuża għall-merkanzija tal-Unjoni:

• li tiċċaqlaq minn Stat Membru għal ieħor permezz ta’ pajjiż tal-EFTA
• li tiċċaqlaq fuq l-art lejn pajjiż tal-EFTA u
• meta tiċċaqlaq minn San Marino (ħlief għal oġġetti li jaqgħu taħt il-Kapitoli 72 u 732 tat-Tariffa) u meta tiċċaqlaq lejn jew minn Andorra (oġġetti li jaqgħu taħt il-Kapitoli 25-97 tat-Tariffa).

(b2) Il-proċedura Interna (T2F) tintuża għall-merkanzija tal-Unjoni:

• jiċċaqilqu lejn, minn jew bejn it-“territorji speċjali”– imsejħa wkoll it-“territorji mhux fiskali”: Iċ-Channel Islands, il-Gżejjer Kanarji, Guadeloupe, Martinique, Guiana, Réunion, il-Muntanja Athos, u l-Gżejjer Åland.

Il-Manwal tat-Tranżitu

L-għan ta’ dan il-manwal huwa li jipprovdi għodda biex jippromwovi fehim aħjar ta’ kif taħdem il-proċedura ta’ tranżitu u r-rwoli tad-diversi parteċipanti, u jispjega kif jista’ jiġi determinat l-istatus doganali tal-merkanzija. Hija wkoll għodda biex tiġi żgurata aħjar applikazzjoni armonizzata tar-regolamenti tat-tranżitu u trattament ugwali tal-operaturi kollha. 

Jekk jogħġbok segwi l-link hawn taħt biex taqra l-Manwal tat-Tranżitu:  Manwal tat-Tranżitu- Uffiċċju tal-Pubblikazzjonijiet tal-Unjoni Ewropea

Il-proċedura taż-Żona Ħielsa

Dħul f’żona ħielsa hija waħda miż-żewġ proċeduri doganali speċjali għall-ħażna (l-oħra hija l-ħażna doganali). Taħt proċedura ta’ ħażna, oġġetti mhux tal-Unjoni jistgħu jinħażnu fl-UE mingħajr ma jkunu soġġetti għal:

• dazju fuq l-importazzjoni;
• ħlasijiet oħra kif previst taħt dispożizzjonijiet rilevanti oħra fis-seħħ
• miżuri ta’ politika kummerċjali, sakemm ma jipprojbixxux id-dħul jew il-ħruġ ta’ merkanzija fi jew mit-territorju doganali tal-Unjoni.

Il-merkanzija tal-Unjoni tista’ titqiegħed taħt proċedura ta’ ħażna skont il-leġiżlazzjoni tal-Unjoni li tirregola oqsma speċifiċi, jew sabiex tibbenefika minn deċiżjoni li tagħti ħlas lura jew remissjoni tad-dazju tal-importazzjoni.

Normalment l-ebda limitu ma jiġi impost fuq il-perjodu li fih il-merkanzija tista’ tibqa’ taħt proċedura ta’ ħażna, għalkemm f’ċirkostanzi eċċezzjonali d-Dwana tista’ tistabbilixxi limitu ta’ żmien għall-proċedura ta’ ħażna li għandha tiġi rilaxxata.

Merkanzija meħuda minn żona ħielsa lejn parti oħra tat-territorju doganali tal-Unjoni jew imqiegħda taħt proċedura doganali għandha titqies bħala merkanzija mhux tal-Unjoni sakemm ma jkunx ġie ppruvat l-istatus doganali tagħha bħala merkanzija tal-Unjoni. Madankollu, għall-finijiet tal-applikazzjoni tad-dazju tal-esportazzjoni u liċenzji tal-esportazzjoni jew miżuri ta’ kontroll tal-esportazzjoni stabbiliti taħt il-politiki agrikoli jew kummerċjali komuni, il-merkanzija għandha titqies bħala merkanzija tal-Unjoni, sakemm ma jkunx stabbilit mod ieħor.

L-awtoritajiet doganali jistgħu jimponu restrizzjonijiet jew projbizzjonijiet fuq ċerti tipi ta’ attivitajiet f’żona ħielsa u jistgħu jipprojbixxu lil ċerti persuni li ma jipprovdux il-garanziji meħtieġa ta’ konformità milli jwettqu attivitajiet f’żona ħielsa.

It-twaqqif ta’ żona ħielsa jeħtieġ awtorizzazzjoni jew att legali nazzjonali li għalih tista’ tiġi ppreżentata applikazzjoni. Għandha ssir applikazzjoni bil-miktub mill-operatur lill-uffiċċju doganali responsabbli għaż-żona ħielsa (It-Taqsima tat-Tranżitu/Żoni Ħielsa). Iż-żona ħielsa għandha tkun magħluqa, b’punti ta’ dħul u ħruġ definiti. Il-perimetru u l-punti tad-dħul u l-ħruġ taż-żona se jkunu soġġetti għal sorveljanza doganali.

L-Istati Membri għandhom jikkomunikaw lill-Kummissjoni tal-UE informazzjoni dwar iż-żoni ħielsa tagħhom li jkunu qed joperaw.

Leġiżlazzjoni

Il-leġiżlazzjoni prinċipali li tirregola l-proċedura tat-tranżitu tal-Unjoni, l-istatus doganali u l-proċedura taż-żona ħielsa tinsab fi:

Il-Kodiċi Doganali tal-Unjoni (ir-Regolament (UE) Nru 952/2013 tal-Parlament Ewropew u tal-Kunsill li jistabbilixxi l-Kodiċi Doganali tal-Unjoni)

L-Att Delegat tal-KDU (ir-Regolament Delegat tal-Kummissjoni Nru 2015/2446 tat-28 ta’ Lulju 2015 li jissupplimenta r-Regolament (UE) Nru 952/2013 tal-Parlament Ewropew u tal-Kunsill fir-rigward ta’ regoli dettaljati dwar ċerti dispożizzjonijiet tal-Kodiċi Doganali tal-Unjoni)

L-Att ta’ Implimentazzjoni tal-KDU (Regolament ta’ Implimentazzjoni tal-Kummissjoni Nru 2015/2447 tal-24 ta’ Novembru 2015 li jistabbilixxi regoli dettaljati għall-implimentazzjoni ta’ ċerti dispożizzjonijiet tar-Regolament (UE) Nru 952/2013 tal-Parlament Ewropew u tal-Kunsill li jistabbilixxi l-Kodiċi Doganali tal-Unjoni)

L-Att Delegat Tranżitorju tal-KDU (ir-Regolament Delegat tal-Kummissjoni Nru 2016/341 tas-17 ta’ Diċembru 2015 li jissupplimenta r-Regolament (UE) Nru 952/2013 tal-Parlament Ewropew u tal-Kunsill fir-rigward tar-regoli tranżitorji għal ċerti dispożizzjonijiet tal-Kodiċi Doganali tal-Unjoni fejn is-sistemi elettroniċi rilevanti għadhom mhumiex operattivi u li jemendaw r-Regolament Delegat (UE) 2015/2446)
Il-Programm ta’ Ħidma tal-KDU (Deċiżjoni ta’ Implimentazzjoni tal-Kummissjoni Nru 2016/578 tal-11 ta’ April 2016 li tistabbilixxi l-Programm ta’ Ħidma relatat mal-iżvilupp u l-użu tas-sistemi elettroniċi previsti fil-Kodiċi Doganali tal-Unjoni)

Il-leġiżlazzjoni li tirregola l-proċedura ta’ tranżitu Komuni tinsab fil-Konvenzjoni bejn l-Unjoni Ewropea u l-Pajjiżi tal-EFTA dwar Proċedura ta’ Tranżitu Komuni (ĠU Nru L226 tat-13/8/87), emendata bid-Deċiżjoni tal-Kumitat Konġunt UE/EFTA Nru 1/2016 tat-28 ta’ April 2016 sabiex jiġu allinjati mal-Kodiċi Doganali tal-Unjoni.

Tgħallem aktar

Tel:  +356 23783331

[email protected]

Office address
Transit/Free Zones Section
within the Specials Procedures Unit
Custom House,
Lascaris Wharf,
Valletta

Postal address 
Transit/Free Zones Section
c/o Custom House
Lascaris Wharf
Valletta – VLT 1920