Rapporti tal-Iskema tal-Irtirar Personali

Ir-Regoli tal-Iskema tal-Irtirar Personali, jiddefinixxu skema li tikkwalifika jew bħala skema ta’ rtirar personali jew kuntratt ta’ assigurazzjoni fit-tul u li tissodisfa l-kundizzjonijiet li ġejjin:

1. Fil-każ ta’ skema ta’ pensjoni tal-irtirar, hija skema li hija rreġistrata skont l-Att dwar Pensjonijiet tal-Irtirar​ jew kwalunkwe liġi oħra li tissostitwixxi dak l-Att u, fil-każ ta’ kuntratt ta’ assigurazzjoni fit-tul maħruġ minn detentur ta’ liċenzja, tipprovdi għal irtirar ipprogrammat tal-arranġamenti kif hemm ipprovdut fir-regoli dwar il-pensjoni maħruġa skont l-imsemmi Att jew liġi oħra; u
2. Tipprovdi għall-bidu tal-benefiċċji ta’ pagament lil individwu li jikkwalifika f’data li ma tkunx qabel id-data li fiha l-individwu jilħaq l-età ta’ 61 sena u mhux aktar tard mid-data meta l-individwu jilħaq l-età ta’ 70 sena, ħlief f’dawk il-każijiet fejn l-iskema tipprovdi għal li l-pagament isir minħabba d-diżabbiltà permanenti jew il-mewt tal-benefiċjarju; u
3. Hija tissodisfa tali kundizzjonijiet ulterjuri li l-Kummissarju jidhirlu li huma xierqa li jiġu imposti.

Obbligu li Jiġu Ppreżentati Rapporti Annwali

Skont l-Artikolu 7(2) tar-Regoli dwar l-Iskema Personali tal-Irtirar (L.S.123.163) l-individwi kollha li jikkwalifikaw li l-kontijiet tat-tfaddil tagħhom jikkwalifikaw bħala skemi ta’ rtirar personali (PRS) huma meħtieġa jissottomettu rapport annwali lill-Uffiċċju tal-Kummissarju għat-Taxxa u d-Dwana.

Il-Format Meħtieġ u s-Sottomissjoni tar-Rapport Annwali

L-Uffiċċju tal-Kummissarju għat-Taxxa u d-Dwana pproduċa  dokument li jipprovdi gwida li tispeċifika d-dettalji u l-format li għandhom jintużaw biex jiġi ppreżentat ir-rapport tal-Iskema ta’ Rtirar Personali lill-Uffiċċju tal-Kummissarju għat-Taxxa u d-Dwana.

Id-data kollha għandha timtela u tiġi sottomessa lill-MTCA sa mhux aktar tard mill-31 ta’ Jannar wara s-sena li għaliha jkun sar il-pagament.

Ikklikkja fuq  il- link​ li ġejja biex taċċessa r-rapport sħiħ.