Żieda Konsiderevoli fil-Penali Imposti fuq is-Sigaretti Illegali

L-importazzjoni, il-forniment u l-konsum ta’ sigaretti bil-kuntrabandu jaffettwaw lill-pajjiż b’mod negattiv u drastiku b’diversi modi. Matul dawn l-aħħar snin, l-Amministrazzjoni tat-Taxxa u tad-Dwana ta’ Malta, minkejja l-kampanja aggressiva ta’ infurzar, kienet qed tqis ukoll is-sitwazzjoni detrimentali kollha.

Minn din l-analiżi, deher biċ-ċar li l-effett deterrenti reali fuq dawk li jiksru l-liġi, huwa pjuttost ineffettiv. Fil-fatt, il-kuntrabandisti ma jaqtgħux qalbhom milli jieħdu r-riskju biex ifornu dawn it-tipi ta’ sigaretti. Dan huwa kkonsolidat mill-ħafna każijiet ripetittivi li l-Amministrazzjoni tat-Taxxa u tad-Dwana ta’ Malta ta’ spiss tiltaqa’ magħhom.

Għalhekk, din is-sitwazzjoni anomala fis-segmenti varji madwar il-pajjiż trid tiġi ttrattata b’tali mod li tindirizza kemm in-naħa tad-domanda kif ukoll in-naħa tal-provvista. Dan ifisser li l-Amministrazzjoni tat-Taxxa u tad-Dwana ta’ Malta ma għandha l-ebda alternattiva oħra ħlief li tipproċedi bl-istess mod kontra dawk li jimportaw u jbigħu, kif ukoll dawk li jikkonsmaw dawn it-tipi ta’ sigaretti.

Għal din ir-raġuni, is-sena l-oħra, il-liġi dwar l-evażjoni tad-dazju tas-sisa ġiet emendata bir-reqqa.

Iż-żieda ta’ tali penali definittivament mhijiex ta’ natura kożmetika kif ġej:

• Is-soluzzjonijiet barra mill-qorti żdiedu minn €250 għal minimu ta’ €1,500; 
• Il-penali tal-qorti żdiedu minn €500 għal minimu ta’ €3,500, sa massimu ta’ €25,000, fil-każ ta’ qbid, filwaqt li fil-każ ta’ evażjoni, dawn żdiedu minn €600 għal minimu ta’ €4,000, sa massimu ta’ €25,000.

Minbarra dan id-deterrent, l-awtoritajiet tad-Dwana u tal-Pulizija se jkunu qed iżidu l-miżuri ta’ infurzar tagħhom billi jżidu r-riżorsi tagħhom.

L-Amministrazzjoni tat-Taxxa u tad-Dwana ta’ Malta setgħet marret lil hinn mill-miżuri proposti, madankollu, inħass li attwalment dan ikun biżżejjed biex jintbagħat messaġġ ċar.