Operazzjonijiet tat-Taxxa

Id-Direttorat tas-Servizzi tal-Kontribwenti jaġixxi bħala l-punt ta’ kuntatt ewlieni għall-kontribwenti li jfittxu gwida dwar ir-rekwiżiti ta’ konformità. Dan id-Direttorat jiffaċilita l-edukazzjoni tal-kontribwenti u l-komunikazzjoni magħhom biex itejjeb il-konformità volontarja filwaqt li jiżgura pjattaformi siguri u faċli biex jintużaw mill-utent sabiex titjieb l-esperjenza tal-kontribwenti u l-effiċjenza operazzjonali.

Id-Direttorat tar-Reġistrazzjoni, l-Iffajljar u l-Valutazzjoni għandu rwol kruċjali biex jiżgura amministrazzjoni tat-taxxa effiċjenti billi jieħu ħsieb ir-reġistrazzjoni tal-kontribwenti, iżomm rekords preċiżi u jinforza l-konformità mal-obbligi tal-iffajljar. Dan jiffaċilita r-reġistrazzjoni bla xkiel għall-individwi u n-negozji, iżomm bażi tad-data sigura u aġġornata tal-kontribwenti tat-taxxa, u jimmonitorja l-konformità mal-iskadenzi permezz ta’ tfakkiriet u avviżi biex iħeġġeġ konformità f’waqtha.

Id-Direttorat tal-Ġbir u l-Ġestjoni tad-Dejn huwa responsabbli mill-ġbir tal-arretrati tat-taxxa kollha, inklużi t-Taxxa fuq l-Introjtu, il-VAT, u s-Sistema ta’ Pagament Finali (Final Settlement System – FSS). Dan jiżgura li l-Kummissarju tat-Taxxa u tad-Dwana jkollu titolu eżekuttiv fuq il-bilanċi pendenti billi joħroġ notifiki ta’ talbiet u ittri ġudizzjarji, filwaqt li jidher ukoll fil-Qrati tal-Liġi u jixhed f’kawżi għall-ġbir u jħarrek lil dawk li jkunu inadempjenti fir-rigward tal-FSS f’kawżi kriminali tal-qorti. Id-Direttorat jiffaċilita l-ħlasijiet tat-taxxa, jimmaniġġja l-programmi ta’ ħlas lura, u jiżgura allokazzjoni xierqa għall-obbligazzjonijiet tat-taxxa korretti, filwaqt li jaqdi rwol kruċjali fl-infurzar tal-konformità u s-salvagwardja tad-dħul tal-gvern.

Id-Direttorat tat-Taxxa fuq il-Proprjetà jamministra l-Att Dwar it-Taxxa fuq Dokumenti u Trasferimenti, l-Att dwar l-Akkwist ta’ Proprjetà Immobbli minn Persuni mhux Residenti u l-Att dwar il-Monte Di Pietà.  Dan id-Direttorat jamministra r-reġistrazzjonijiet kollha tal-Konvenji u l-Kuntratti ta’ Bejgħ ta’ Proprjetà Immobbli, id-dikjarazzjonijiet Causa Mortis, u t-Trasferimenti ta’ Ishma.  Huwa joħroġ permessi għall-akkwist ta’ proprjetà immobbli lil Ċittadini ta’ pajjiżi terzi u jamministra l-operazzjonijiet tal-Monte di Pietà.