Taxxa Korporattiva

Taxxa Korporattiva

Din it-taqsima dwar it-Taxxa Korporattiva tipprovdi ħarsa ġenerali lejn il-kwistjonijiet tat-taxxa li wieħed jista’ jiltaqa’ magħhom mill-bidu tal-kumpanija sa meta l-kumpanija titneħħa mir-reġistru.

L-entitajiet li huma soġġetti għat-taxxa fuq il-kumpaniji huma dawk li jaqgħu taħt id-definizzjoni ta’ kumpanija prevista fl-Artikolu 2 tal-Att dwar it-Taxxa fuq l-Income.

Skont il-leġiżlazzjoni tagħna dwar it-taxxa fuq l-introjtu, il-kumpaniji Maltin huma soġġetti għat-taxxa korporattiva bir-rata ta’ 35% fuq l-introjtu u l-qligħ kapitali tagħhom mad-dinja kollha. Il-kumpaniji barranin, inkorporati barra minn Malta li jwettqu attivitajiet kummerċjali f’Malta huma soġġetti għal taxxa fuq l-introjtu li joriġina f’Malta.

Meta l-kumpaniji jiġu intaxxati bir-rata standard ta’ 35%, wara d-distribuzzjoni tad-dividendi, l-azzjonisti huma intitolati għal rifużjoni ta’ parti mit-taxxa jew tat-taxxa kollha mħallsa mill-kumpanija. L-għan ta’ din is-sistema ta’ imputazzjoni huwa li tiġi eliminata kwalunkwe tassazzjoni doppja li tista’ tinħoloq fuq id-distribuzzjoni ta’ tali dividendi. Għalhekk il-profitti tal-kumpanija se jkunu soġġetti għat-taxxa fil-livell korporattiv biss.