Mistoqsijiet Frekwenti – Mistoqsijiet Ġenerali

Mistoqsijiet Frekwenti – Mistoqsijiet Ġenerali

1. Id-dikjarazzjoni tat-taxxa tiegħi tinkludi introjtu mill-Imgħax Bankarju meta kont tlabt lill-Bank tiegħi biex inaqqas 15% Taxxa minn Ras il-Għajn Finali mill-kont tad-depożitu tiegħi. X’nista’ nagħmel biex nirranġa dan l-iżball?

L-ewwel għandek tivverifika jekk l-Imgħax Bankarju li qed jiġi ċċarġjat huwiex fil-fatt tiegħek. Jekk dan ikun il-każ, allura kkuntattja lill-Bank tiegħek sabiex fil-futur l-imgħax ma jiġix irrappurtat lill-Uffiċċju tal-Kummissarju għat-Taxxa u d-Dwana. M’hemm l-ebda azzjoni korrettiva x’tittieħed fuq id-Dikjarazzjoni tat-Taxxa li rċevejt.

Jekk l-imgħax ma jappartjenix lilek, itlob lill-Bank tiegħek biex jikteb lill-Uffiċċju tal-Kummissarju għat-Taxxa u d-Dwana biex jikkoreġi l-iżball. Imbagħad għandek timla Formola ta’ Aġġustament (Adjustment Form, AF 1) biex tikkoreġi d-Dikjarazzjoni tat-Taxxa.

2. Jekk nidħol fi ftehim mal-Uffiċċju tal-Kummissarju għat-Taxxa u d-Dwana biex inħallas ammont dovut għas-sena bażi 2000 bin-nifs, niġi ċċarġjat imgħax fuq il-bilanċ mhux imħallas wara d-data dovuta?

Iva. Il-bilanċi kollha dovuti mis-sena bażi 1998 ’il quddiem jibqgħu soġġetti għal imgħax ta’ 0.33% fix-xahar jew parti minnu anki jekk ikunu koperti minn ftehim ta’ ħlas bin-nifs.

3. Jien sirt armla imma rċevejt biss Dikjarazzjoni tat-Taxxa fuq l-Introjtu taħt isem ir-raġel mejjet tiegħi. X’nista’ nagħmel biex nirċievi waħda f’ismi?

Tista’ ċċempel, tikteb jew tmur personalment fit-Taqsima tal-Għajnuna għall-Klijenti tagħna u tagħti d-dettalji meħtieġa jiġifieri:

Numru tal-Karta tal-Identità
Isem u indirizz (skont il-karta tal-identità)
Id-data tal-mewt tar-raġel
In-Numru tal-Karta tal-Identità tar-Raġel (jew in-Numru tat-Taxxa jekk kien barrani)

Imbagħad se tirċievi Dikjarazzjoni tat-Taxxa fuq l-Introjtu li għandha timtela bid-dettalji kollha tal-introjtu li tkun qlajt wara l-mewt tar-raġel tiegħek. L-introjtu li tkun qlajt inti jew li jkun qala’ r-raġel tiegħek qabel mewtu għandu jiġi inkluż fid-Dikjarazzjoni tat-Taxxa fuq l-Introjtu tar-raġel tiegħek. Iż-żewġ dikjarazzjonijiet għandhom jiġu ffirmati u flimkien ma’ kwalunkwe dokument relattiv (jekk ikun hemm), għandhom jintbagħtu bil-posta lill-Uffiċċju tal-Kummissarju għat-Taxxa u d-Dwana fil-Furjana.

4. Jien impjegat u għandi impjieg indipendenti part-time. Jien intitolat għar-rata tat-taxxa speċjali ta’ 10% fuq il-profitt derivat mill-impjieg part-time?

Il-kontribwenti tat-taxxa impjegati li jkollhom ukoll introjtu minn xogħol part-time bħala persuna li taħdem għal rasha jistgħu jagħżlu li jimlew il-formola TA22 u jħallsu taxxa ta’ 10% fuq il-Profitt Nett mill-impjieg part-time. L-ammont massimu ta’ profitt li jista’ jiġi soġġett għal din ir-rata huwa ta’ €12,000. Kwalunkwe ammont li jaqbeż dan ikollu jiġi ddikjarat fid-Dikjarazzjoni tat-Taxxa fuq l-Introjtu u jiġi intaxxat bir-rati standard normali. L-introjtu muri fil-formola TA22 m’għandux jiġi inkluż mill-kontribwent fid-Dikjarazzjoni tat-Taxxa fuq l-Introjtu annwali tiegħu sakemm ma jkunx jixtieq jitlob lura t-taxxa mħallsa b’dan il-mod.

5. Jien kontribwent tat-taxxa li naħdem għal rasi u l-introjtu tiegħi għal din is-sena naqas. Nista’ nnaqqas it-Taxxa Provviżorja dovuta għas-sena kurrenti?

Iva, tista’ tnaqqas l-ammont ta’ taxxa provviżorja dovuta għas-sena kurrenti billi timla formola ta’ tnaqqis tat-taxxa provviżorja (PT) li tista’ tinkiseb mill-Uffiċċju tal-Kummissarju għat-Taxxa u d-Dwana. Id-domanda għall-PT tiġi aġġustata u bbażata fuq id-dikjarazzjoni tiegħek. Madankollu, jekk id-Dikjarazzjoni tat-Taxxa għas-sena inkwistjoni tirriżulta f’Taxxa Provviżorja mhux imħallsa kollha kemm hi, l-ammont imħallas inqas ikun soġġett għal imgħax ta’ 1% fix-xahar jew parti minnu.