Mistoqsijiet dwar is-Sistema ta’ Pagament Finali (FSS)

INWETTQU T-TRASFORMAZZJONI

my Tax

Freephone
għaċ-ċittadini

153

Numru tat-telefown
għan-negozji

144

Mistoqsijiet dwar is-Sistema ta’ Pagament Finali (FSS)

1. X’inhi d-data tal-għeluq għas-sottomissjoni tad-Dokumenti FS7 u FS3?

Id-data tal-għeluq għas-sottomissjoni tad-dokumenti ta’ rikonċiljazzjoni annwali FS7 u FS3 hija l-15 ta’ Frar tas-sena ta’ wara.

2. Kif għandhom jiġu inklużi l-ġenituri waħedhom fil-formola FS4?

Fuq il-formola FS4 ġenitur wieħed għandu jimmarka l-kaxxa B2 u jikteb bil-linka ħdejha l-kliem “ġenitur wieħed”. Biex jikkwalifika għar-rati tat-taxxa tal-miżżewġin ġenitur wieħed (mhux miżżewweġ/miżżewġa, armel/armla, separat(a)) għandu jissodisfa l-kundizzjonijiet li ġejjin:

Irid ikun mantna wild minuri li ma kellux aktar minn 16-il sena matul is-sena. Jekk il-wild minuri kellu aktar minn dik l-età u kien student full-time jew kien inabilitat milli jmantni lilu nnifsu minħabba mard, il-ġenitur wieħed jikkwalifika xorta waħda iżda l-wild ma jridx ikun qed jirċievi introjtu ta’ aktar minn €2,400 għalih innifsu;
Irid ikun ġie rikonoxxut mid-Direttur tas-Sigurtà Soċjali bħala l-benefiċjarju tal-Allowance tat-Tfal imħallas fir-rigward tal-wild;
Ma jkunx iriċeva assistenza finanzjarja għall-manteniment ta’ dak il-wild mill-ġenitur l-ieħor tal-wild;
Ma jridx ikun għex fl-istess dar mal-ġenitur l-ieħor tal-wild.

3. Kif jista’ wieħed jimla l-FS3s ta’ koppja għas-sena li fiha żżewġet?

Koppja li tiżżewweġ għandha tiddeċiedi dwar min se jitqies bħala l-konjuġi responsabbli. Il-konjuġi responsabbli għandu jkollu l-emolumenti kollha li qala’ matul is-sena taż-żwieġ f’FS3 waħda filwaqt li l-konjuġi l-ieħor għandu jinforma lil min iħaddmu biex joħroġ żewġ formoli FS3 li jkopru l-perjodi ta’ qabel u ta’ wara ż-żwieġ rispettivament.

4. Kif għandu wieħed jikkalkula t-taxxa ta’ koppja li sseparat matul is-sena u kif għandhom jimtlew l-FS3s?

Mis-sena bażi 2009, fil-każ fejn koppja tkun isseparat, iż-żewġ konjuġi huma meħtieġa jirreġistraw separatament bħala kontribwent mal-Uffiċċju tal-Kummissarju għat-Taxxa u d-Dwana. Dan jista’ jsir billi jintbagħat l-att ta’ separazzjoni.

Kull konjuġi jkun responsabbli biex jissottometti d-Dikjarazzjoni tat-Taxxa tiegħu nnifsu li tkopri l-introjtu mdaħħal mill-1 ta’ Jannar sal-31 ta’ Diċembru. Kull individwu jiġi intaxxat bħala persuna waħidha u jkun responsabbli li jħallas it-taxxa relattiva fuq l-introjtu mdaħħal. Ir-rati tal-miżżewġin japplikaw jekk l-individwu jikkwalifika bħala Ġenitur Wieħed.

5. Kif għandu jiġi ttrattat il-manteniment imħallas direttament mis-salarju?

Jekk il-manteniment ikun qed jitħallas lill-konjuġi u mhux lit-tfal, u sakemm ikun hemm att pubbliku ta’ separazzjoni legali jew digriet mill-Qorti, l-impjegatur jista’ jikteb lill-Kummissarju għat-Taxxa u d-Dwanau jitlob tnaqqis fir-rata tal-FSS skont ir-regola 6(2) tar-Regolamenti dwar l-FSS tal-1998. Trid tiġi ppreżentata wkoll kopja tal-kuntratt ta’ separazzjoni. Din l-approvazzjoni ġeneralment tingħata bil-kundizzjoni li:

a. Il-ħlas tal-manteniment isir mill-impjegatur direttament lill-konjuġi separat tal-impjegat;

b. L-ammont sħiħ ta’ emolumenti inkluż il-ħlas tal-manteniment jiġi rrappurtat fuq l-FS3 tal-impjegat u l-impjegat jimla Formola tat-Taxxa fuq l-Introjtu u ta’ Awtovalutazzjoni fejn jitlob tnaqqis fir-rigward tal-manteniment f’dik il-formola.

6. Kif għandhom jiġu ttondjati ċ-ċenteżmi?

Iċ-ċenteżmi għandhom jiġu ttondjati sal-eqreb ewro. Madankollu, fil-każ ta’ xogħol part-time, it-taxxa ta’ 15% fuq l-introjtu totali annwali għandha dejjem tiġi ttondjata ’l fuq għall-ewro li jmiss.

7. Kif għandu impjegatur jintaxxa impjegat meta ma timteliex FS4?

F’każijiet bħal dawn, l-impjegatur huwa marbut bir-Regoli dwar l-FSS li jnaqqas it-taxxa bir-rata ta’ 35% mill-paga tal-impjegat u jibgħat l-ammont lid-dipartiment.

8. Kif għandhom jiġu ttrattati l-emolumenti ta’ direttur għall-finijiet tal-FSS?

L-emolumenti ta’ direttur għandhom dejjem jiġu rrappurtati taħt l-FSS rispettivament għall-fatt li s-sigurtà soċjali tiegħu titħallas fuq bażi ta’ impjieg indipendenti.

9. Min jista’ jikkwalifika għat-taxxa minn ras il-għajn ta’ 10% fuq l-introjtu minn part-time?

L-impjegati full-time, il-pensjonanti jew l-istudenti full-time jistgħu jikkwalifikaw għat-tnaqqis ta’ 10% taxxa minn ras il-għajn fuq l-introjtu derivat minn impjieg part-time, sakemm jiġu ssodisfati l-kundizzjonijiet li ġejjin:

a. L-impjieg ikun irreġistrat ma’ Jobsplus;

b. Ix-xogħol imwettaq ikun inqas minn 30 siegħa fil-ġimgħa;

c. Ir-remunerazzjoni lill-impjegat ma tirriżultax mill-okkupazzjoni ta’ kariga f’bord jew tribunal maħtur mill-Gvern u lill-Membri tal-Parlament u l-Kunsilli Lokali;

d. L-introjtu ma jkunx ġej minn ħlasijiet u pagamenti simili oħra magħmula lil membri tal-Bord tad-Diretturi ta’ kumpaniji jew ta’ bordijiet ta’ korporazzjonijiet pubbliċi u;

e. Jekk l-impjegat ikun impjegat full-time u jwettaq ukoll impjieg part-time, l-impjegaturi rispettivi ma jridux ikunu jiffurmaw parti mill-istess organizzazzjoni jew grupp ta’ kumpaniji.

Sabiex jikkwalifika individwu jrid jaderixxi mal-kundizzjonijiet kollha a, b, c, d u e. Jekk individwu jkun miżżewweġ, anke jekk dik il-persuna taħdem biss part-time, xorta tista’ tibbenefika mir-rata ta’ part-time, sakemm il-konjuġi tagħha jkollu impjieg full-time jew ikun pensjonant jew student/apprendist.

Jekk dawn il-kundizzjonijiet ma jiġux issodisfati, l-emolumenti miksuba minn impjieg part-time jiżdiedu jew jitqiesu bħala l-Introjtu Prinċipali u jiġu intaxxati skont dan. Kull meta japplikaw id-dispożizzjonijiet dwar il-part-time, l-ammont massimu ta’ introjtu li jiġi ċċarġjat m’għandux jaqbeż l-€10,000. L-introjtu mill-impjieg part-time ’il fuq minn dan jiġi ċċarġjat bħala Introjtu Prinċipali u jrid jiġi ddikjarat fid-dikjarazzjoni tat-taxxa. Dan ifisser li titħallas taxxa massima ta’ €1,000 fuq l-impjieg part-time.

Hija r-responsabbiltà tal-impjegat li jiddeċiedi jekk it-taxxa minn ras il-għajn ta’ 15% fuq il-part-time titnaqqasx jew le.

Ir-remunerazzjoni mħallsa lill-uffiċjali tal-pulizija għat-twettiq ta’ xogħol addizzjonali li ma jkunx parti mid-dmirijiet normali tal-uffiċjal tal-pulizija u ma jkunx sahra, għandha titqies bħala introjtu minn xogħol part-time.

10. Kif tista’ tiġi kkalkulata t-taxxa tal-FSS?

Wieħed jista’ jikkalkula l-FSS billi juża l-ispreadsheet li tinsab fuq is-sit web tal-Kummissarju għat-Taxxa u d-Dwana.

11. Liema proċeduri għandi nsegwi meta nimpjega persunal?

Jekk qed timpjega persunal, għandek:

Tirreġistra bħala impjegatur mad-Dipartiment;
Tissottometti l-formoli FS4 għal kull impjegat mal-bidu tal-impjieg tagħhom;
Tnaqqas mill-emolumenti tal-impjegat tiegħek kwalunkwe taxxa u Kontribuzzjonijiet tas-Sigurtà Soċjali (Social Security Contributions, SSC) dovuti;
Tibgħat dan it-tnaqqis lill-Kummissarju għat-Taxxa u d-Dwana sal-aħħar tax-xahar ta’ wara dak li fih sar il-ħlas tal-emolumenti. Il-ħlas għandu jsir permezz tal-formola FS5;
Tissottometti Dikjarazzjoni tal-Qligħ annwali (FS3) tal-impjegati kollha tiegħek flimkien mad-Dikjarazzjoni ta’ Rikonċiljazzjoni Annwali (FS7) sal-15 ta’ Frar tas-sena ta’ wara;
Tinforma lid-Dipartiment malli ma tibqax impjegatur (Formola tad-Dereġistrazzjoni)

12. X’għandi nagħmel meta nieqaf nimpjega persunal?

Jekk persuna ma tibqax impjegatur, hija tkun meħtieġa tittermina r-reġistrazzjoni tan-Numru PE billi:

Tippreżenta l-formoli FS3 u FS7 għas-sena kurrenti sad-data ta’ meta ma tibqax impjegatur;
Tissottometti kwalunkwe dokument FS3 u FS7 pendenti għas-snin preċedenti;
Tintbagħat FS7 żero meta ma jkun hemm l-ebda data x’tiġi rrappurtata għal kwalunkwe sena speċifika;
Tħallas kwalunkwe bilanċ pendenti fir-rigward tat-taxxa u tal-kontribuzzjonijiet tas-sigurtà soċjali, kemm tal-impjegatur kif ukoll tal-impjegat/i;
Timla l-formola tad-dereġistrazzjoni

13. Jekk kumpanija ma tħallasx pagi jew salarji u d-diretturi jirċievu biss Perkaċċi, hemm bżonn li l-kumpanija tiġi rreġistrata bħala impjegatur?

Iva. Kumpanija li tipprovdi perkaċċi biss xorta hija meħtieġa tirreġistra bħala impjegatur u tibgħat il-formoli tal-FSS meħtieġa lid-dipartiment. Il-perkaċċ huwa meqjus bħala parti mill-emolumenti li direttur jew impjegat jirċievi mill-kumpanija.

14. Il-pagamenti tal-FSS jistgħu jsiru kull erba’ xhur, bħall-pagamenti PT għal dawk li jaħdmu għal rashom, speċjalment fejn ikun hemm numru żgħir ta’ impjegati?

Le. Skont id-dispożizzjonijiet tar-Regolamenti dwar l-FSS, il-pagamenti tal-FSS għandhom isiru sa mhux aktar tard mill-aħħar tax-xahar li jiġi wara x-xahar li fih ikunu saru dovuti. Pereżempju, jekk impjegatur inaqqas it-taxxa tal-FSS u l-SSC għal Jannar, wieħed għandu jissottometti r-rimessa flimkien mal-formola FS5 sa mhux aktar tard mill-aħħar ta’ Frar.

Sottomissjoni Online ta’ Dokumenti tal-FSS

1. Kemm iddum biex tibgħat id-dokumenti tal-FSS (FS7 u FS3s) online fl-aħħar tas-sena?

Il-proċess elettroniku għas-sottomissjoni tad-dokumenti FSS fl-aħħar tas-sena jieħu madwar 10 minuti biex jitlesta.

2. Kemm iddum biex tibgħat FS4 online?

Il-proċess elettroniku għas-sottomissjoni ta’ FS4 jieħu madwar 10 minuti biex jitlesta.

3. Kemm iddum biex tibgħat FS5 online?

Il-proċess elettroniku għas-sottomissjoni tal-FS5 jieħu madwar 10 minuti biex jitlesta.

4. Kemm idum l-Uffiċċju tal-Kummissarju għat-Taxxa u d-Dwana biex ilesti s-sottomissjoni tal-FSS tiegħek?

Il-proċess tal-verifika u l-ipproċessar tas-sottomissjoni jieħu perjodu massimu ta’ 90 jum ta’ xogħol.

my account

The form was submitted successfully!