Aġġornat l-Aħħar: 14/10/2022

Jekk inti persuna li twettaq attività ekonomika, irrispettivament mir-riżultat jew l-ambitu ta’ dik l-attività, allura inti meqjus bħala persuna taxxabbli. Taħt ċirkostanzi normali, inti meħtieġ tirreġistra għall-VAT skont l-Artikolu 10. Jekk il-fatturat annwali tiegħek ma jaqbiżx il-limitu stabbilit (ara hawn taħt) allura tista’ tagħżel li tirreġistra skont l-Artikolu 11 bħala persuna eżentata.

Persuni bbażati barra minn Malta jistgħu wkoll ikunu obbligati li jirreġistraw għall-VAT f’Malta jekk huma stess ikunu obbligati jħallsu l-VAT f’Malta fuq provvista meqjusa li sseħħ f’Malta.

 

Attività ekonomika tfisser attività mwettqa minn persuna, li mhijiex impjegata (ara l-Artikolu 5(5) għad-definizzjoni ta’ impjegat), u li tikkonsisti fi kwalunkwe waħda jew aktar minn dawn li ġejjin:

·         kwalunkwe kummerċ, negozju, professjoni jew vokazzjoni u l-forniment ta’ kwalunkwe servizz personali;

·         l-isfruttament ta’ proprjetà tanġibbli jew intanġibbli għall-fini li jinkiseb introjtu minnu fuq bażi kontinwa;

·         il-forniment minn klabb, assoċjazzjoni jew organizzazzjoni tal-faċilitajiet jew il-vantaġġi disponibbli għall-membri tagħha għal abbonament jew korrispettiv ieħor;

·         l-ammissjoni ta’ persuni fi kwalunkwe bini għal korrispettiv.

L-attivitajiet ta’ awtorità pubblika li tassumi funzjonijiet assenjati lilha bil-liġi m’għandhomx jitqiesu bħala attività ekonomika ħlief kif u sal-punt previst fl-Ewwel Skeda tal-Att dwar il-VAT u ħlief meta tali trattament bħala persuni mhux taxxabbli jwassal għal distorsjonijiet sinifikanti fil-kompetizzjoni.

 

Hemm tliet tipi ta’ Reġistrazzjonijiet għall-VAT kif ġej: (a) Jekk qed tforni oġġetti jew servizzi u l-fatturat annwali tiegħek jaqbeż il-limitu eżentat stabbilit hawn taħt, għandek tirreġistra għall-VAT skont l-Artikolu 10, li bih tkun obbligat li titlob il-VAT fuq il-provvisti taxxabbli tiegħek u tkun tista’ titlob lura l-VAT li ġġarrab waqt l-attività taxxabbli tiegħek taħt ċerti kundizzjonijiet.

Persuna rreġistrata skont l-Artikolu 10

·         ikollha numru tal-VAT bil-prefiss MT

·         ikollha toħroġ irċevuti fiskali jew fatturi tat-taxxa, skont il-każ, fuq il-provvisti kollha magħmula minnha

·         normalment tissottometti dikjarazzjoni tal-VAT għal perjodu tat-taxxa ta’ tliet xhur sa mhux aktar tard minn 6 ġimgħat wara t-tmiem tal-perjodu tat-taxxa, jew kif ordnat mill-Kummissarju.

(b) Jekk qed tforni oġġetti jew servizzi u l-fatturat annwali tiegħek ma jaqbiżx il-limitu tad-dħul stabbilit (ara hawn taħt), tista’ tirreġistra għall-VAT bħala eżentat skont l-Artikolu 11. F’dan il-każ ma titlobx il-VAT fuq il-provvisti tiegħek u ma tkunx tista’ titlob lura l-VAT li ġġarrab waqt l-attività ekonomika tiegħek. Madankollu, tista’ minflok tagħżel li tirreġistra għall-VAT skont l-Artikolu 10 biex tiċċarġja l-VAT u titlob tnaqqis tal-VAT imġarrba bil-mod normali. Jekk tiddeċiedi li tagħżel l-aħħar opzjoni, allura inti tkun meħtieġ tibqa’ taħt l-Artikolu 10 għal minimu ta’ sitta u tletin xahar. Huwa biss wara dak il-perjodu li tkun tista’ tirreġistra skont l-Artikolu 11 u sakemm il-limitu tal-ħruġ ma jinqabiżx.

Persuna rreġistrata skont l-Artikolu 11

·         ikollha numru ta’ identifikazzjoni mingħajr il-prefiss MT

·         ikollha toħroġ irċevuti fiskali fuq il-provvisti kollha magħmula minnha

·         tissottometti dikjarazzjoni (dikjarazzjoni tat-taxxa ssimplifikata) fl-aħħar ta’ kull sena kalendarja li trid tiġi sottomessa sal-15 ta’ Marzu tas-sena ta’ wara.

(c) Jekk inti persuna ġuridika mhux taxxabbli jew persuna taxxabbli mhux irreġistrata skont l-Artikolu 10, u tagħmel akkwisti intrakomunitarji ta’ oġġetti f’Malta li l-valur tagħhom jaqbeż l-€10,000 mill-bidu tas-sena, allura inti obbligat li tirreġistra għall-VAT skont l-Artikolu 12 u tħallas il-VAT f’Malta kull darba li tagħmel tali akkwisti intrakomunitarji.

Jekk inti rreġistrat taħt l-Artikolu 11 bħala persuna taxxabbli eżentata u għandek l-intenzjoni li tagħmel Akkwisti Intrakomunitarji u tħallas il-VAT fuqhom f’Malta, allura jeħtieġlek tirreġistra wkoll skont l-Artikolu 12 biex tikseb numru ta’ identifikazzjoni validu għal dan il-għan u tikkwalifika għal tali arranġament.

 

Il-limitu tad-dħul huwa l-ammont ta’ fatturat fis-sena li bih persuna tista’ tagħżel li tirreġistra bħala persuna eżentata skont l-Artikolu 11 (ara hawn fuq). Dan il-limitu jiddependi fuq jekk intix qed twettaq attivitajiet li jikkonsistu prinċipalment fil-provvista ta’ oġġetti jew attivitajiet oħra. Il-limitu tal-ħruġ jiġi applikat fil-każ fejn persuna li tkun irreġistrata skont l-Artikolu 10 tibdel ir-reġistrazzjoni tagħha għall-Artikolu 11 (eżentata). “Attivitajiet oħra” tirreferi għal-limitu għal persuni li l-attività ekonomika tagħhom tikkonsisti prinċipalment fil-provvista ta’ servizz.  

Il-limiti differenti huma kif ġej:

Attività Ekonomika

Limitu tad-Dħul

Limitu tal-Ħruġ

Attività ekonomika li tikkonsisti prinċipalment mill-provvista ta’ oġġetti

€35,000

€28,000

Attivitajiet ekonomiċi oħra

€30,000

€24,000

 

Meta persuna rreġistrata skont l-Artikolu 11 tipprovdi kemm oġġetti kif ukoll servizzi, il-limitu applikabbli għandu jiġi ddeterminat skont in-natura prinċipali tal-provvista, filwaqt li jitqies il-valur totali tal-provvisti kollha.​

Il-fatturat ta’ negozju huwa l-valur totali tal-bejgħ, eskluż:

·         Provvisti eżentati mingħajr kreditu

·         It-trasferiment ta’ negozju bħala negozju avvjat

·         Il-bejgħ ta’ assi fissi

·         Provvisti magħmula lin-negozju u meqjusa li jsiru minn dak in-negozju skont id-dispożizzjonijiet tar-reverse charge

Il-limiti għal kull attività ekonomika li tappartjeni għall-istess kategorija huma assenjati mid-Dipartiment u japplikaw b’mod ġenerali għal dik il-kategorija.

 

Kopja tal-Karta tal-Identità/Passaport tal-applikant, jew fil-każ ta’ Kumpanija b’Responsabbiltà Limitata, tar-rappreżentant awtorizzat vestit bir-rappreżentanza legali trid tiġi ppreżentata fil-ħin tar-reġistrazzjoni. Fil-każ ta’ kumpanija b’responsabbiltà limitata jew sħubija reġistrata, għandha tiġi ppreżentata kopja tal-Memorandum u l-Istatut ta’ Assoċjazzjoni.

 

Ir-reġistrazzjoni għall-finijiet tal-VAT għandha ssir online permezz tas-Servizzi tar-Reġistrazzjonijiet tas-CFR Online. Ġeneralment tkun meħtieġa e-ID Maltija biex taċċessa s-Servizzi tas-CFR Online.

Madankollu jingħata aċċess lil persuni li ma jkollhomx e-ID jekk tali persuni ma jistax ikollhom e-ID. F’dawn il-każijiet, jekk jogħġbok segwi din il-gwida.

 

Dan jiddependi mit-tip ta’ reġistrazzjoni tal-persuna.

Reġistrazzjoni tal-VAT skont l-Artikolu 10: Dikjarazzjoni tal-VAT għal kull perjodu tal-VAT għandha tiġi sottomessa lill-Kummissarju tat-Taxxa sa xahar u 15-il jum mit-tmiem tal-perjodu tal-VAT rispettiv. Il-perjodu tal-VAT tipikament allokat lil persuna rreġistrata skont l-Artikolu 10 ikun perjodu ta’ 3 xhur kalendarji. Japplikaw eċċezzjonijiet fejn perjodu tat-taxxa jista’ jkun ta’ aktar jew inqas minn 3 xhur. Perjodu ta’ 12-il xahar tal-VAT japplika fejn il-valur tal-bejgħ magħmul ma jaqbiżx il-“Limitu tal-Ħruġ” rilevanti kif speċifikat fis-Sitt Skeda tal-Att dwar il-VAT. Jistgħu jiġu applikati wkoll perjodi tal-VAT ta’ kull xahar fid-diskrezzjoni tal-Kummissarju tat-Taxxa.

Reġistrazzjoni tal-VAT skont l-Artikolu 11: Dikjarazzjoni perjodika li tkopri perjodu kalendarju ta’ 12-il xahar għandha tiġi sottomessa lill-Kummissarju tat-Taxxa sa xahar u 15-il jum mit-tmiem tal-perjodu kalendarju ta’ 12-il xahar.

Reġistrazzjoni tal-VAT skont l-Artikolu 12:  Id-dikjarazzjonijiet ta’ akkwisti intrakomunitarji ta’ oġġetti magħmula li għalihom il-persuna hija obbligata tħallas il-VAT hija stess f’Malta għandhom jiġu sottomessi lill-Kummissarju tat-Taxxa sa mhux aktar tard minn 15-il jum mill-aħħar tax-xahar li fih ikun seħħ tali akkwist. Id-dikjarazzjonijiet tax-xiri ta’ servizzi li għalihom il-persuna hija obbligata tħallas il-VAT hija stess f’Malta għandhom jiġu sottomessi lill-Kummissarju tat-Taxxa sa mhux aktar tard minn xahar u 15-il jum mill-aħħar tax-xahar li fih jiġi riċevut is-servizz (jew ix-xahar meta tinħareġ fattura tat-taxxa, jekk tali fattura tinħareġ fi żmien 15-il jum mit-tmiem tax-xahar li fih jiġi riċevut is-servizz).

(Jekk jogħġbok innota li din l-informazzjoni tipprovdi biss gwida ġenerali għal applikazzjoni ġenerali u ma tissostitwixxix id-dispożizzjonijiet tal-leġiżlazzjoni tal-VAT.)

 

Il-proċess elettroniku għad-Dikjarazzjoni tal-VAT jieħu madwar 15-il minuta biex jitlesta.

Gwida b’rabta mar-regoli għar-Rifużjonijiet tal-VAT lil persuni taxxabbli mhux stabbiliti fl-Istat Membru ta’ rifużjoni iżda stabbiliti fi Stat Membru ieħor tista’ tinstab hawn.

 

Il-proċess tal-verifika u l-ipproċessar tas-sottomissjoni jieħu perjodu massimu ta’ 90 jum ta’ xogħol. JEKK RIFUŻJONI DOVUTA LILEK MA TITĦALLASX FIL-ĦIN, ALLURA INTI TITĦALLAS IMGĦAX TA’ 0.33% FIX-XAHAR (L.S. 406.19).

 

Il-proċess elettroniku għar-Rifużjoni tal-VAT (it-8 Direttiva) jieħu madwar 20 minuta biex jitlesta.

 

Il-proċess tal-verifika u l-ipproċessar tas-sottomissjoni jieħu perjodu massimu ta’ 4 xhur. JEKK RIFUŻJONI DOVUTA LILEK MA TITĦALLASX FIL-ĦIN, ALLURA INTI TITĦALLAS IMGĦAX TA’ 0.33% FIX-XAHAR.

 

Jekk qed topera taħt il-limitu u għażilt li tiġi kklassifikat bħala persuna eżentata, int għandek id-dmir li tinforma lid-Dipartiment li m’għadekx tikkwalifika biex tiġi kklassifikat bħala eżentat malli jsir ovvju li se taqbeż il-limitu applikabbli.

Dan tista’ tasal għalih billi tikkalkula l-fatturat annwali għat-tnax-il xahar ta’ qabel fi tmiem kull trimestru kalendarju. Meta jirriżulta li l-limitu applikabbli qed jinqabeż, għandek tinforma lid-Dipartiment fi żmien tletin jum minn meta dan iseħħ, u l-VAT trid tinġabar immedjatament wara li jiskadi dan il-perjodu.

 

Jekk l-attività kummerċjali l-ġdida se tiżdied ma’ attivitajiet kummerċjali oħra li wettaqt taħt numru tal-VAT, l-istess numru għandu jintuża għall-attività l-ġdida. Madankollu għandek tinforma lid-Dipartiment bil-miktub dwar in-natura tal-attività kummerċjali l-ġdida.

Jekk l-attività kummerċjali l-ġdida tkun se titwettaq taħt kumpanija ġdida b’responsabbiltà limitata stabbilita biex twettaq tali attività, ikun meħtieġ numru ta’ reġistrazzjoni ġdid.

 

Le, mhux se jkollok għalfejn terġa’ tirreġistra. Inti se tuża l-istess numru tal-VAT iżda jeħtieġ li tavża lid-Dipartiment dwar dan l-avveniment, billi tagħti d-dettalji pertinenti kollha bħall-Isem u l-indirizz tal-fergħa l-ġdida, iż-żieda fin-numru ta’ impjegati u ż-żieda stmata tal-fatturat tan-negozju tiegħek.

 

Jekk inti kummerċjant waħdieni allura inti meħtieġ li tittermina r-reġistrazzjoni tan-negozju tiegħek filwaqt li ibnek, jew kwalunkwe persuna li tieħu f’idejha n-negozju tiegħek trid tagħmel applikazzjoni ġdida għar-reġistrazzjoni tal-VAT, sakemm dik il-persuna ma tkunx diġà rreġistrata għall-VAT.

Madankollu, jekk in-negozju huwa Kumpanija b’responsabbiltà limitata, allura t-trasferiment għandu jitwettaq permezz tal-Awtorità tas-Servizzi Finanzjarji ta’ Malta (MFSA), u d-Dipartiment tal-VAT għandu jiġi avżat dwar il-bidla fid-Diretturi u l-Azzjonisti tal-Kumpanija, permezz ta’ kopja ċċertifikata tal-memoranda pprovduti mill-istess MFSA.

 

Sabiex tittermina r-reġistrazzjoni tal-VAT inti trid iċċempel lit-Taqsima tal-Customer Care tad-Dipartiment biex timla l-formola xierqa. Applikazzjoni għad-dereġistrazzjoni ma tistax tiġi pproċessata sakemm ma jkollokx id-dikjarazzjonijiet tal-VAT u l-pagamenti kollha aġġornati, u kwalunkwe kwistjoni pendenti riżolta mad-Dipartiment.

Ta’ min jinnota li jekk inti rreġistrat bħala mhux eżentat (skont l-Artikolu 10) inti titqies li fornejt lilek innifsek l-assi kollha tan-negozju li fadal li jappartjenu għan-negozju tiegħek, immedjatament qabel il-kanċellazzjoni tar-reġistrazzjoni tiegħek. F’dan ir-rigward għalhekk trid tagħti rendikont tal-VAT dovuta fuqhom fl-aħħar dikjarazzjoni tal-VAT tiegħek.

 

Biex tittermina r-reġistrazzjoni l-ewwel trid issolvi l-kwistjonijiet pendenti kollha mad-Dipartiment. Jekk tkompli tirċievi formoli tal-VAT u rendikonti tal-bilanċ ta’ kull xahar wara li tkun applikajt għad-dereġistrazzjoni, għandek iċċempel lit-Taqsima tal-Customer Care tad-Dipartiment matul il-ħinijiet tal-uffiċċju biex tistaqsi dwar is-sitwazzjoni tiegħek. L-uffiċjali tad-dipartiment jiggwidawk skont il-bżonn.

Ladarba l-kwistjonijiet pendenti kollha jkunu ġew solvuti, inkluż il-ħlas ta’ kwalunkwe ammont pendenti dovut lid-Dipartiment, l-azzjoni għad-dereġistrazzjoni tiġi ffinalizzata.

 

Sabiex terġa’ tattiva n-numru ta’ reġistrazzjoni tal-VAT l-antik tiegħek għandek tinforma lid-Dipartiment bil-miktub fejn tagħmel it-talba tiegħek. In-numru tar-reġistrazzjoni tal-VAT u n-Numru tal-Karta tal-Identità tiegħek għandhom ikunu inklużi fl-ittra tiegħek.

 

Il-VAT tal-input hija l-VAT li titħallas mill-operatur kummerċjali għal oġġetti u servizzi li jirċievi matul l-attività ekonomika tiegħu. Il-VAT tal-output hija l-VAT li jitlob l-operatur kummerċjali meta huwa jforni oġġetti jew servizzi lill-klijenti tiegħu.

 

F’Malta, l-oġġetti u s-servizzi huma ġeneralment taxxabbli b’rata standard tal-VAT ta’ 18%.

Madankollu, ċerti oġġetti u servizzi għandhom rata mnaqqsa ta’ 7% jew 5% jew 0%.

Provvisti li huma taxxabbli b’7% huma:

·         L-akkomodazzjoni f’lukanda jew guest house

·         L-akkomodazzjoni fi kwalunkwe bini, fejn għall-fini ta’ dik l-akkomodazzjoni, ikun meħtieġ li l-bini jkun liċenzjat skont l-Att dwar Servizzi tal-Ivvjaġġar u tat-Turiżmu għal Malta.

·      Użu ta’ faċilitajiet sportivi

Provvisti li huma taxxabbli b’5% huma:

·         Provvista ta’ elettriku

·         Ħelu u oġġetti oħra li jittieklu

·         Aċċessorji Mediċi

·         Materja Stampata

·         Ċerti Oġġetti għall-użu esklussiv ta’ persuni b’diżabilità

·         Tiswija minuri ta’ roti, żraben u oġġetti tal-ġilda, ħwejjeġ u bjankerija tad-dar (inkluż tiswija u alterazzjoni)

·         Servizzi ta’ kura domestika bħal għajnuna u kura fid-dar għat-tfal, l-anzjani, il-morda jew il-persuni b’diżabilità

·         Dħul f’mużewijiet, wirjiet tal-arti, kunċerti u teatri.

·         Servizzi relatati mill-qrib mal-apparat dijanjostiku tal-COVID-19​

Il-provvisti li ġejjin għandhom rata ta’ 0% (jiġifieri eżentati bi kreditu, fejn l-ebda VAT ma tiġi imposta fuq il-valur tal-provvista iżda l-persuna rreġistrata hija intitolata li titlob lura l-VAT tal-input imġarrba fil-forniment ta’ dik il-provvista)

·         Ikel għall-konsum mill-bniedem

·         Prodotti farmaċewtiċi

·         Servizz skedat tal-karozzi tal-linja

·         Trasport domestiku tal-passiġġieri fuq il-baħar bejn il-gżejjer

·         Trasport internazzjonali tal-passiġġieri

·         Esportazzjonijiet

·         Provvisti intrakomunitarji ta’ oġġetti

(Jekk jogħġbok żomm f’moħħok li din l-informazzjoni ma tissostitwixxix id-dispożizzjonijiet tal-leġiżlazzjoni dwar il-VAT. Din il-lista mhix eżawrjenti u jkun xieraq li tirreferi għal-leġiżlazzjoni dwar il-VAT)

Il-provvisti li ġejjin huma eżentati mingħajr kreditu, fejn ma tiġi imposta l-ebda VAT fuq il-valur tal-provvista iżda l-fornitur mhuwiex intitolat li jitlob lura l-VAT tal-input imġarrba fil-forniment ta’ dik il-provvista. F’dan il-każ il-fornitur mhuwiex meħtieġ jirreġistra mad-Dipartiment.

·         Provvista ta’ ilma minn Awtorità Pubblika

·         Provvista ta’ bini u art għall-bini

·         Provvista ta’ servizzi tas-Saħħa u l-Benesseri

·         Provvista ta’ servizzi finanzjarji u tal-assigurazzjoni

·         Il-kiri ta’ proprjetà immobbli huwa eżentat mingħajr kreditu ħlief fis-sitwazzjonijiet li ġejjin:

o   Kiri għal skopijiet ta’ akkomodazzjoni fi kwalunkwe lukanda jew guest house jew stabbiliment simili jew fi kwalunkwe kamp tal-vaganzi jew sit tal-ikkampjar (b’7%)

o   Kiri ta’ akkomodazzjoni f’appartamenti tal-vaganzi meħtieġa li jkunu liċenzjati skont Att dwar Servizzi tal-Ivvjaġġar u tat-Turiżmu għal Malta (b’7%)

o   Il-kiri ta’ proprjetà immobbli minn kumpanija b’responsabbiltà limitata lil persuna rreġistrata għall-attività ekonomika ta’ dik il-persuna rreġistrata (bi 18%)

(Jekk jogħġbok żomm f’moħħok li din l-informazzjoni ma tissostitwixxix id-dispożizzjonijiet tal-leġiżlazzjoni dwar il-VAT. Din il-lista mhix eżawrjenti u jkun xieraq li tirreferi għal-leġiżlazzjoni dwar il-VAT)

 

L-ammont tal-fatturat taxxabbli għall-VAT, jiġifieri l-valur taxxabbli ta’ provvista, huwa ddeterminat skont is-Seba’ Skeda tal-Att dwar il-VAT. Bħala regola ġenerali, il-valur taxxabbli ta’ provvista huwa l-valur riċevut jew riċevibbli mill-fornitur bi tpattija għall-provvista magħmula lill-klijent. Dan jinkludi kwalunkwe sussidju direttament marbut ma’ dik il-provvista iżda jeskludi l-VAT.

Il-valur taxxabbli ta’ provvista għandu jinkludi taxxi, dazji, imposti, tariffi u ħlasijiet oħra relatati ma’ dik il-provvista u wkoll spejjeż inċidentali bħal kummissjonijiet u spejjeż tal-ippakkjar, tat-trasport u tal-assigurazzjoni mitluba mill-fornitur lix-xerrej (anki jekk ikunu koperti minn ftehim/dokument separat)

Il-valur taxxabbli ta’ provvista jeskludi: 

   a)  tnaqqis fil-prezz fil-forma ta’ skontijiet għal ħlas bikri;

   b)  ribassi u tnaqqis ieħor fil-prezz 

   c)  penali u imgħax għal ħlas tard

   d)  ċerti żborżamenti mħallsa f’isem u minħabba l-klijent

   e)  depożiti fuq ippakkjar ritornabbli fejn id-depożitu jkun inqas mill-ispiża tal-ippakkjar.

Jekk il-ħlas isir parzjalment jew kompletament in natura, jew meta l-valur tal-ħlas għal provvista ma jistax jiġi ddeterminat, il-porzjon tal-valur taxxabbli ta’ dik il-provvista li ma jistax jiġi ddeterminat għandu jkun il-valur tas-suq miftuħ tiegħu. Il-valur tas-suq miftuħ huwa l-prezz li l-oġġett jew is-servizz sottostanti jikseb jekk jinbiegħ fis-suq miftuħ fid-data u fl-istat li kien fih meta l-oġġett imsemmi jiġi kkonsenjat jew meta s-servizzi jitwettqu.

(Jekk jogħġbok innota li din l-informazzjoni tipprovdi biss gwida ġenerali għal applikazzjoni ġenerali u ma tissostitwixxix id-dispożizzjonijiet tal-leġiżlazzjoni tal-VAT.)

 

Meta n-natura tal-użu tal-proprjetà li fuqha ntalbet il-VAT tal-input tkun inbidlet minn taxxabbli jew eżentata b’operazzjoni ta’ kreditu għal eżentata mingħajr kreditu, parti waħda minn dik il-VAT tal-input mitluba għandha titħallas lura lid-Dipartiment permezz ta’ aġġustament fid-dikjarazzjoni tal-VAT. Dan l-aġġustament għandu jsir fi żmien għoxrin sena għal proprjetà immobbli u fi żmien ħames snin għal kwalunkwe proprjetà oħra.

Pereżempju: jekk lukanda (attività taxxabbli) tinbidel għal dar tal-anzjani (eżentata mingħajr kreditu), parti mill-VAT tal-input li ntalbet ikollha titħallas lura lid-Dipartiment. Fir-rigward tal-proprjetà immobbli dan għandu jinħadem bħala proporzjon għal perjodu ta’ għoxrin sena, jiġifieri jekk il-bidla fl-attività ekonomika sseħħ wara għaxar snin, nofs il-VAT tal-input oriġinali mitluba trid tiġi rrimborżata.

 

Sabiex jiġi ddeterminat jekk il-VAT tal-input imġarrba fuq provvisti magħmula barra minn Malta tistax tintalab lura jew le, wieħed irid jistabbilixxi jekk dawn, kieku saru f’Malta, kinux jiġu ttrattati bħala provvisti taxxabbli jew provvisti eżentati bi kreditu.

Jekk iva, il-valur ta’ dawn il-provvisti għandu jiġi inkluż fid-dikjarazzjoni tal-VAT bħala provvisti eżentati bi kreditu.

Jekk ma jeżisti l-ebda dritt li titlob lura l-VAT tal-input, il-valur tagħhom għandu jiġi inkluż fid-dikjarazzjoni tal-VAT bħala provvisti eżentati mingħajr kreditu.

 

Persuni li huma rreġistrati għall-VAT skont l-Artikolu 10 (jiġifieri ma għażlux li jiġu kklassifikati bħala persuni eżentati) huma intitolati li jitolbu lura tant mill-VAT tal-input li hija attribwibbli għal provvisti taxxabbli, provvisti eżentati bi kreditu, provvisti magħmula barra minn Malta li, kieku dawn saru f’Malta, kienu jiġu kklassifikati bħala provvisti taxxabbli jew provvisti eżentati bi kreditu, u provvisti magħmula barra minn Malta li huma eżentati mingħajr kreditu skont il-leġiżlazzjoni Maltija dwar il-VAT iżda huma soġġetti għall-VAT barra minn Malta.

Meta l-attività ekonomika ta’ persuna rreġistrata tikkonsisti f’taħlita ta’ provvisti taxxabbli/eżentati bi kreditu u provvisti eżentati mingħajr kreditu, il-VAT tal-input ikollha titqassam billi jintuża jew il-metodu dirett ta’ attribuzzjoni jew il-metodu ta’ attribuzzjoni parzjali.

Meta l-metodi ta’ hawn fuq ma jagħtux riżultat ġust u raġonevoli, il-Kummissarju għandu s-setgħa li jiddeċiedi dwar il-perċentwal tal-attribuzzjoni.

Madankollu, skont id-dispożizzjonijiet tal-leġiżlazzjoni, ċerta VAT tal-input imġarrba fuq ċerti provvisti hija mblukkata u ma tistax tintalab lura anki meta tkun imġarrba fuq spejjeż relatati mal-attività ekonomika.

 

Persuni li jipprovdu provvisti eżentati mingħajr kreditu (eż. kumpaniji tal-assigurazzjoni u servizzi tal-edukazzjoni u tas-saħħa u soċjali), u persuni li huma kklassifikati bħala persuni eżentati ma jistgħux jitolbu lura l-VAT tal-input imġarrba fuq xiri relatat man-negozju tagħhom.

L-ebda VAT tal-input ma tista’ tintalab fuq il-provvisti li ġejjin anki meta tali provvisti jinxtraw in konnessjoni mal-attività ekonomika ta’ persuna rreġistrata, jiġifieri VAT tal-input imġarrba fuq:

·         Tabakk jew prodotti tat-tabakk, sakemm ma jinxtrawx għall-bejgħ mill-ġdid

·         Xorb alkoħoliku, sakemm ma jinxtrawx għall-bejgħ mill-ġdid

·         Xogħlijiet tal-arti u antikitajiet, jiġifieri pitturi, tpinġijiet u pastelli eżegwiti bl-idejn, minbarra oġġetti manifatturati miżbugħa bl-idejn jew imżejna bl-idejn; inċiżjonijiet, stampi u litografi oriġinali; skulturi u statwi oriġinali, ta’ kwalunkwe materjal; antikitajiet ta’ aktar minn mitt sena; kollezzjonijiet u biċċiet ta’ kollezzjoni ta’ interess żooloġiku, botaniku, mineraloġiku, anatomiku, storiku, arkeoloġiku, paleontoloġiku u etnografiku, sakemm ma jinxtrawx għall-bejgħ mill-ġdid

·         Vetturi bil-mutur, bastimenti jew inġenji tal-ajru, esklużi bastimenti u inġenji tal-ajru akkwistati għall-fini li jiġu pprovduti skont ftehim ta’ charter jew ta’ kiri, sakemm ma jinxtrawx għall-bejgħ mill-ġdid jew sakemm ma jinxtrawx u jintużaw għall-fini tat-trasport ta’ merkanzija jew passiġġieri għal korrispettiv.

·        Oġġetti u servizzi għall-fini tat-tiswija, il-manutenzjoni u ż-żamma ta’ vetturi bil-mutur, bastimenti jew inġenji tal-ajru u fjuwil użat għalihom fejn il-VAT fuq il-vetturi bil-mutur, il-bastimenti jew l-inġenji tal-ajru rispettivi nfushom hija jew tkun imblukkata.​

·         Kiri ta’ karozza minn lokatarju, inkluża l-VAT imġarrba fuq il-fjuwil

·         Il-provvista ta’ kwalunkwe oġġett u servizz użat fil-provvista ta’ riċevimenti, divertiment jew ospitalità ħlief meta dik il-provvista ssir waqt l-attività ekonomika normali

·         Il-provvista ta’ oġġetti u servizzi użati fil-forniment ta’ trasport jew divertiment minn persuna lill-impjegati tagħha, ħlief fejn it-trasport huwa pprovdut fuq vetturi b’kapaċità ta’ mhux inqas minn seba’ postijiet.

 

Iva, sakemm il-vettura tkun vettura kummerċjali u tintuża fit-twettiq tal-attività ekonomika tiegħek. Id-Dipartiment jista’ madankollu, wara li jivverifika u jivvaluta fatturi bħalma huma l-proporzjon tal-użu “għan-negozju” mal-użu “privat”; il-firxa tal-fatturat iddikjarat tiegħek vis-a-vis l-ispiża kapitali fix-xiri tal-vettura u l-ħtieġa għax-xiri tal-vettura b’rabta mat-tip ta’ attività ekonomika tiegħek eċċ., jaġġusta t-talba tiegħek għall-VAT tal-input kif jidhirlu meħtieġ.

Il-liġi tal-VAT tikkunsidra bħala vetturi kummerċjali, vetturi bil-mutur iddisinjati prinċipalment għat-trasport ta’ oġġetti b’postijiet bilqiegħda normalment maġenb is-sewwieq u li normalment mhumiex adattati għat-trasport ta’ passiġġieri, jew b’akkomodazzjoni bilqiegħda għal disa’ persuni jew aktar.

 

It-tobba, il-kontabilisti u professjonisti oħra huma intitolati għar-rifużjoni tal-VAT imħallsa fuq vetturi u fjuwil?

Il-provvista ta’ servizzi mediċi hija kklassifikata bħala eżentata mingħajr kreditu u għalhekk it-tobba ma jitolbux VAT u mhumiex permessi kwalunkwe kreditu fuq il-VAT tal-input li jġarrbu.

Il-kontabilisti u professjonisti oħra mhumiex intitolati li jitolbu lura l-VAT imħallsa fuq ix-xiri ta’ vettura u dik imħallsa fuq il-fjuwil.

 

Fattura tat-taxxa trid tinħareġ meta persuna rreġistrata skont l-Artikolu 10 tagħmel provvista lil persuna rreġistrata oħra.

Irċevuta fiskali trid tinħareġ meta persuna rreġistrata tagħmel provvista lil persuna mhux irreġistrata.

 

Fatturi tat-Taxxa

Fattura tat-taxxa maħruġa minn persuna rreġistrata li mhijiex ikklassifikata bħala persuna eżentata għandu jkun fiha l-informazzjoni li ġejja:

·         id-data tal-ħruġ;

·         numru sekwenzjali, ibbażat fuq serje waħda jew aktar, li jidentifika b’mod uniku l-fattura;

·         l-isem u l-indirizz tal-fornitur u n-numru ta’ identifikazzjoni tal-VAT li bih tkun għamlet il-provvista;

·         l-isem u l-indirizz tal-persuna li lilha ssir il-provvista u n-numru ta’ identifikazzjoni tal-VAT li bih il-klijent akkwista l-oġġetti jew is-servizzi fornuti lilu;

·         il-kwantità u n-natura tal-oġġetti fornuti jew il-firxa u n-natura tas-servizzi mogħtija;

·         id-data li fiha saret jew tlestiet il-provvista jew id-data li fiha sar ħlas minħabba l-provvista sa fejn dik id-data tista’ tiġi ddeterminata u tvarja mid-data tal-ħruġ tal-fattura;

·         il-valur taxxabbli għal kull rata jew eżenzjoni, il-prezz ta’ unità eskluż it-taxxa u kwalunkwe skont jew ribass jekk ma jkunux inklużi fil-prezz ta’ unità;

·         ir-rata tal-VAT applikata;

·         l-ammont tal-VAT pagabbli, ħlief meta jiġi applikat arranġament speċjali;

·         meta l-persuna obbligata li tħallas il-VAT tkun rappreżentant tat-taxxa fi Stat Membru ieħor, in-numru ta’ identifikazzjoni tal-VAT ta’ dak ir-rappreżentant tat-taxxa, flimkien mal-isem sħiħ u l-indirizz tiegħu;

·         meta l-VAT issir taxxabbli fiż-żmien meta jiġi riċevut il-pagament, il-kliem “Kontabilità abbażi tal-ħlasijiet”;

·         meta l-klijent li jirċievi provvista joħroġ il-fattura minflok il-fornitur, il-kliem “Awtofatturar”;

·         meta fattura tat-taxxa tirreferi għal provvisti li mhumiex taxxabbli, din għandha tagħmel referenza fil-qosor għad-dispożizzjonijiet rilevanti tal-Att dwar il-VAT, jew id-dispożizzjonijiet xierqa tad-Direttiva tal-Kunsill 2006/112/KE, jew kwalunkwe indikazzjoni oħra li fuq il-bażi tagħha l-ebda taxxa mhija imposta;

·         meta l-klijent ikun obbligat iħallas il-VAT, il-kliem “Reverse charge”;

·         meta tiġi applikata l-iskema ta’ marġni għall-aġenti tal-ivvjaġġar, il-kliem “Skema ta’ marġni – Aġenti tal-ivvjaġġar”;

·         meta jiġi applikat wieħed mill-arranġamenti speċjali applikabbli għal oġġetti użati, xogħlijiet tal-arti, oġġetti u antikitajiet ta’ kollezzjoni, il-kliem “Skema ta’ marġni – Oġġetti użati”; “Skema ta’ marġni – Xogħlijiet tal-arti” jew “Skema ta’ marġni – Oġġetti u antikitajiet ta’ kollezzjoni” rispettivament;

·         f’fattura għall-provvista intrakomunitarja ta’ mezz ġdid ta’ trasport, id-deskrizzjoni tal-oġġett fornut għandu jkun fiha d-dettalji msemmija fid-definizzjoni ta’ “mezzi ġodda ta’ trasport” fl-Att dwar il-VAT.

 

Fil-każ ta’ tranżazzjoni lokali fejn il-persuna taxxabbli obbligata li tħallas il-VAT ma tkunx obbligata tħallas il-VAT u l-ammont tal-fattura inkluża t-taxxa ma jkunx ogħla minn €100, jew meta l-persuna rreġistrata li tkun qed tagħmel il-provvista tkun persuna eżentata, tista’ tintuża fattura simplifikata. Din il-fattura simplifikata għandu jkun fiha mill-inqas id-dettalji li ġejjin:

·         id-data tal-ħruġ;

·         numru sekwenzjali, ibbażat fuq serje waħda jew aktar, li jidentifika b’mod uniku l-fattura;

·         l-isem, l-indirizz u n-numru ta’ identifikazzjoni tat-Taxxa fuq il-Valur Miżjud tal-fornitur;

·         in-numru ta’ identifikazzjoni tat-Taxxa fuq il-Valur Miżjud tal-persuna li lilha ssir il-provvista;

·         deskrizzjoni suffiċjenti biex tidentifika l-oġġetti u s-servizzi pprovduti;

·         l-ammont totali tat-taxxa pagabbli jew l-informazzjoni meħtieġa għall-kalkolu tagħha;

·         meta l-fattura maħruġa tkun dokument jew messaġġ ittrattat bħala fattura, referenza speċifika u ċara għal dik il-fattura inizjali u d-dettalji speċifiċi li qed jiġu emendati.

 

Il-bejjiegħa bl-imnut u l-persuni li l-attività tagħhom tikkonsisti fil-provvista ta’ ikel waqt il-catering (eż. ristoranti u snack bars) iridu joħorġu rċevuta fiskali permezz ta’ cash register fiskali.

Il-fornituri tas-servizzi jridu joħorġu rċevuta fiskali manwali minn kotba tal-irċevuti fiskali manwali pprovduti mid-Dipartiment mal-applikazzjoni.

Il-Cash Register Fiskali u l-irċevuti fiskali manwali għandhom jinżammu fil-bini fejn tkun se ssir l-attività ekonomika.

Is-sewwieqa tat-taksi jridu joħorġu l-irċevuti fiskali permezz ta’ tassimetru fiskali.

Il-persuni rreġistrati li jkunu beħsiebhom jużaw l-irċevuti kompjuterizzati jridu jiksbu l-approvazzjoni minn qabel bil-miktub mid-Dipartiment. Mal-approvazzjoni, in-numru ta’ eżenzjoni maħruġ mid-Dipartiment irid jintwera fuq l-irċevuta, jew b’mezz elettroniku.

Il-biljetti tad-dħul għall-avvenimenti jistgħu jiġu aċċettati wkoll bħala rċevuti fiskali sakemm tintalab approvazzjoni bil-miktub minn qabel mid-Dipartiment. In-numru tal-permess tal-VAT maħruġ mid-Dipartiment għandu jintwera fuq il-biljett.

 

Irċevuta fiskali titqies bħala tali meta tinħareġ f’waħda mis-sitwazzjonijiet li ġejjin:

·         Permezz ta’ cash register fiskali approvata

·         Fuq il-kotba tal-irċevuti fiskali manwali pprovduti mid-Dipartiment

·         Permezz ta’ sistema kompjuterizzata jew elettronika jew sistema ta’ punt ta’ bejgħ, sakemm tkun inkisbet approvazzjoni minn qabel mid-Dipartiment u n-numru ta’ eżenzjoni maħruġ mid-Dipartiment ikun stampat fuq l-irċevuta

·         B’applikazzjoni u wara l-approvazzjoni mid-Dipartiment, il-biljetti tad-dħul għal avveniment jistgħu jiġu approvati bħala rċevuti fiskali sakemm l-informazzjoni kif meħtieġa bil-miktub mid-Dipartiment tkun stampata fuq kull biljett

·         Permezz ta’ tassimetru fiskali.

 

Il-persuni li jipprovdu provvisti eżentati mingħajr kreditu mhumiex meħtieġa joħorġu rċevuti fiskali, għalkemm xorta huma obbligati joħorġu rċevuta ordinarja skont leġiżlazzjoni oħra eżistenti.

Dawn il-persuni mhumiex meħtieġa jirreġistraw mad-Dipartiment.

 

Trid toħroġ irċevuta fiskali. L-irċevuti fiskali għandhom dejjem jinħarġu għal provvisti ta’ oġġetti jew servizzi lil persuni li huma eżentati mingħajr kreditu. Ma jimpurtax jekk il-fornitur huwiex persuna rreġistrata mhux eżentata jew persuna rreġistrata eżentata.

 

Bejjiegħ bl-imnut u persuna li tipprovdi l-ikel waqt il-catering (eż. ristorant jew snack bar) għandhom dejjem joħorġu rċevuta fiskali għal kull provvista magħmula (ħlief fil-każijiet fejn il-leġiżlazzjoni tippermetti li ċerti provvisti jkunu koperti minn irċevuta fiskali li tinħareġ fl-aħħar tal-ġurnata biex tkopri l-provvisti magħmula matul dik il-ġurnata). Dan jgħodd kemm għall-provvisti taxxabbli kif ukoll għall-provvisti eżentati bi kreditu.

Meta bejjiegħ bl-imnut jagħmel provvista taxxabbli lil persuna oħra rreġistrata, din tal-aħħar tista’ titlob lill-bejjiegħ bl-imnut biex joħroġ fattura tat-taxxa minflok irċevuta fiskali.

Irċevuta fiskali maħruġa permezz ta’ cash register fiskali tista’ tiġi aċċettata bħala fattura tat-taxxa jekk tinkludi d-dettalji ta’ hawn fuq li huma meħtieġa f’fattura tat-taxxa.

 

Jekk ikun hemm qtugħ fl-elettriku, persuna rreġistrata trid toħroġ irċevuta fiskali manwali għal kull provvista magħmula.

L-istess japplika meta l-cash register jkollha xi ħsara. Madankollu, il-persuna rreġistrata kkonċernata hija obbligata li tiżgura li l-cash register fiskali tagħha tissewwa fl-iqsar żmien possibbli.

 

Meta bejjiegħ bl-imnut li jkun ikklassifikat bħala persuna eżentata joħroġ irċevuta fiskali permezz ta’ cash register fiskali fuq il-bejgħ ta’ provvista li kienet tkun taxxabbli li kieku ma kinitx għal dik il-klassifikazzjoni, ir-rata tat-taxxa li għandha tiġi indikata fuq dik l-irċevuta fiskali għandha tkun “F” u mhux “E”.

 

Iva, il-kategoriji ta’ negozju murija hawn taħt huma intitolati li joħorġu irċevuta fiskali waħda fl-aħħar tal-ġurnata biex ikopru l-bejgħ ta’ provvisti magħmula matul il-ġurnata:

·         Persuni rreġistrati li jagħmlu provvisti ta’ gass, ħalib u prodotti tal-ħalib jew ħobż minn vettura jew permezz ta’ kunsinna bieb bieb jew lill-pubbliku ġenerali fi triq pubblika.

·         Persuna rreġistrata li tagħmel provvisti ta’ fjuwil minn pompi.

·         Persuna rreġistrata li tagħmel provvisti ta’ ikel u xorb li jinsabu f’żona ta’ xogħol jew studju, wara li l-awtorizzazzjoni tkun intalbet u ngħatat bil-miktub mid-Dipartiment biex toħroġ irċevuta fiskali waħda fl-aħħar tal-ġurnata biex tkopri provvisti ta’ ikel magħmula matul dik il-ġurnata u rċevuta fiskali oħra biex tkopri provvisti ta’ xorb magħmula matul dik il-ġurnata.

·         Persuna rreġistrata li tagħmel provvisti ta’ ħobż mill-forn fejn dak il-ħobż ikun ġie moħmi.

Fil-każ tal-persuni rreġistrati msemmija taħt it-tielet u r-raba’ punti hawn fuq, id-Dipartiment jista’, fi kwalunkwe ħin, jirtira l-awtorizzazzjoni permezz ta’ avviż bil-miktub.

 

Inti trid iżżomm ir-rekords u d-dokumenti li ġejjin:

·         Kopji tal-Irċevuti Fiskali maħruġa

·         Il-Qari FCR Z tal-cash register fiskali

·         Id-dokumentazzjoni Doganali kollha dwar l-importazzjoni/l-esportazzjoni

·         Il-Fatturi tax-Xiri u tal-Bejgħ

·         Noti ta’ Debitu u Kreditu

·         Kotba tal-Flus Kontanti u Reġistri tal-Ispejjeż Żgħar

·         Ktieb tax-Xiri u l-Bejgħ tal-Ġurnata

·         Kont tat-Taxxa fuq il-Valur Miżjud u Kont tal-VAT Annwali

·         Kont Bankarju marbut man-negozju

·         Kwalunkwe rekord u dokument ieħor rilevanti għall-attività ekonomika tiegħek

Inti obbligat li żżomm dawn ir-rekords u d-dokumenti għal sitt snin peress li d-Dipartiment jista’ jitlobhom għal spezzjoni.

Madankollu, f’każijiet fejn japplikaw id-dispożizzjonijiet għall-aġġustament tat-taxxa tal-input fuq oġġetti kapitali u fuq proprjetà immobbli, is-sitt snin għandhom jibdew jgħoddu mit-tmiem tal-perjodu ta’ ħames snin jew il-perjodu ta’ għoxrin sena rispettivament skont il-każ.

 

L-ispezzjonijiet mid-Dipartiment tal-VAT huma maħsuba biex:

·         Il-persuni rreġistrati jiġu edukati rigward id-drittijiet u l-obbligi tagħhom vis-a-vis il-VAT;

·         Jiġi ċċekkjat l-obbligu tat-taxxa ta’ persuna rreġistrata biex jiġi żgurat li l-ammont it-tajjeb ta’ taxxa qed jinġabar u jintbagħat lid-Dipartiment;

·         Jiġu eżaminati u vverifikati t-talbiet għar-rifużjonijiet magħmula minn persuni rreġistrati;

·         Jiġi eżerċitat kontroll fuq l-attività kummerċjali ta’ persuni rreġistrati billi jiġu eżaminati r-rekords tan-negozju u l-kotba tal-kontijiet tagħhom biex jiġi żgurat li ma tkun qed issir l-ebda sottodikjarazzjoni tat-taxxa tal-output u/jew dikjarazzjoni żejda tat-taxxa tal-input;

·         Isiru kontrolli fuq il-post fl-istabbilimenti tal-persuna rreġistrata biex jiġi żgurat li qed jinħarġu l-irċevuti fiskali lill-klijenti mal-bejgħ ta’ prodott/servizz.

 

Dażgur li tista’ tikkuntattja lill-Ispettur tal-VAT biex tiftiehmu fuq appuntament f’jum konvenjenti għat-tnejn li intom. Madankollu, ma tistax tirrifjuta li tilqa’ lill-Ispettur peress li dan huwa kuntrarju għal-liġi.

Għandek tkun taf ukoll li l-ispettur tal-VAT jista’ jitlob lil kwalunkwe persuna biex tipproduċi, jew jista’ jieħu mingħand kwalunkwe persuna, inkluża parti terza, ir-rekords, id-dokumenti, il-kontijiet u d-data elettronika meħtieġa li tinżamm minnha u jagħmel kopji tagħhom.

 

L-Ispettur tal-VAT huwa obbligat fi tmiem żjara, li jiddiskuti dawk l-oqsma ta’ nuqqas ta’ qbil miegħek. Jekk in-nuqqas ta’ qbil jibqa’ jippersisti u fl-opinjoni tal-Ispettur tal-VAT, l-iżbalji tiegħek irriżultaw f’taxxa sottodikjarata jew f’VAT tal-input iddikjarata żżejjed, id-Dipartiment jipproċedi biex jagħmillek “Stimi Provviżorji”.

Meta tirċievi avviż ta’ “Stima Provviżorja” tista’, jekk tkun trid, tirreġistra fi żmien 30 jum, “Talba għal Reviżjoni” mad-Dipartiment fejn tiddikjara b’mod preċiż u speċifiku r-raġunijiet tiegħek għan-nuqqas ta’ qbil.

Din it-“Talba għal Reviżjoni” tiġi pproċessata minn Uffiċjal tar-Reviżjoni li wara li jwettaq il-verifiki meħtieġa jista’ jikkanċella, jaġġusta jew jikkonferma l-istima provviżorja.

 

Sabiex ikun validu, appell kontra stima sottomessa lit-Tribunal ta’ Reviżjoni Amministrattiva jrid jissodisfa l-kriterji li ġejjin:

·         dikjarazzjoni għall-perjodu tat-taxxa li għalih tirreferi l-istima tkun ingħatat lill-Kummissarju qabel ma jiġi ppreżentat l-appell;

·         it-taxxa kollha pagabbli mill-appellant li ma tkunx qed tiġi kkontestata tkun tħallset;

·         isir fi żmien tletin jum mid-data tan-notifika tal-avviż li kontrih isir l-appell;

·         isir f’dik il-forma u b’dak il-mod li jista’ jiġi preskritt skont l-Att dwar il-Ġustizzja Amministrattiva;

·         sar pagament ta’ tali tariffi għall-preżentata ta’ appell kif jista’ jiġi preskritt skont l-Att dwar il-Ġustizzja Amministrattiva.

 

Is-servizzi li jsiru lil membri ta’ organizzazzjonijiet mingħajr skop ta’ qligħ huma eżentati mingħajr kreditu u l-organizzazzjoni mhijiex meħtieġa tirreġistra għall-VAT.

Madankollu, meta l-organizzazzjoni tipprovdi servizzi oħra bi ħlas, kull provvista tkun trid tiġi kkunsidrata fil-kuntest tal-leġiżlazzjoni tal-VAT.

Dawn li ġejjin huma xi eżempji fejn organizzazzjoni mingħajr skop ta’ qligħ tkun meħtieġa tirreġistra mad-Dipartiment, u soġġett għad-dritt u l-għażla tagħha li tiġi kklassifikata bħala persuna eżentata, titlob u tiġbor il-VAT:

·         tħaddem bar għall-membri tagħha

·         tikri spazju lil partijiet terzi biex jintuża bħala bar

·         tbigħ spazju għar-reklamar fir-rivista tagħha

·         Tagħmel attivitajiet ta’ ġbir ta’ fondi, ħlief jekk il-benefiċjarju ta’ attivitajiet bħal dawn ikun istituzzjoni tas-saħħa, soċjali jew edukattiva. F’każijiet bħal dawn ikun irid jinġieb il-permess tad-Dipartiment minn qabel għall-eżenzjoni.

Jekk organizzazzjoni mingħajr skop ta’ qligħ tkun meħtieġa tirreġistra mad-Dipartiment u ma tagħżilx li tiġi kklassifikata bħala persuna eżentata, id-dritt tagħha li titlob taxxa tal-input ikun limitat għall-provvisti li fuqhom tinġabar il-VAT, jew billi tattribwixxi direttament l-inputs tagħha jew billi tattribbwixxi parzjalment tali inputs.

 

Bħala regola ġenerali l-persuni kollha rreġistrati jridu jagħtu rendikont tal-VAT fuq il-bażi ta’ fattura (dovuti). Madankollu, id-Dipartiment jista’ jagħti struzzjonijiet li l-kontabbiltà għall-VAT għall-fornituri li ġejjin issir fuq il-bażi ta’ flus kontanti:

·         Bejjiegħa bl-imnut.

·         Provvisti minn kuntratturi tal-inġinerija ċivili, mekkanika u elettrika.

Il-provvisti ta’ servizzi professjonali fejn il-persuna li tipprovdi dawk is-servizzi jkollha warrant maħruġ skont kwalunkwe liġi fis-seħħ f’Malta biex tipprattika dik il-professjoni għandhom jagħtu rendikont tal-VAT fuq bażi ta’ flus kontanti. Sabiex jagħtu rendikont tal-VAT fuq il-bażi ta’ fattura, il-persuni li jipprovdu tali servizzi jridu jitolbu awtorizzazzjoni bil-miktub mid-Dipartiment.

Meta persuna rreġistrata tagħti rendikont tal-VAT fuq bażi ta’ flus kontanti tali kontabbiltà trid issir fir-rigward ta’ provvisti magħmula lilha u provvisti magħmula minnha.

 

Meta qridt il-fatturi tiegħek ipperikolajt serjament il-pretensjoni tiegħek għall-VAT tal-Input peress li l-VAT tal-Input tista’ tkun permessa biss jekk tkun appoġġata minn fattura tat-taxxa valida. Jekk ma jiġux ippreżentati fatturi tat-taxxa validi għall-ispezzjoni mid-Dipartiment, issir stima biex tiġi annullata l-pretensjoni tiegħek għall-VAT tal-Input.

 

Dan l-aħħar bdilt id-dar u biddilt il-Karta tal-Identità tiegħi kif suppost. Kelli l-impressjoni li d-Dipartiment tal-Karti tal-Identità kien se jinforma lid-Dipartiment tal-VAT dwar il-bidla fl-indirizz tiegħi, iżda bqajt nirċievi d-dikjarazzjonijiet tat-taxxa tiegħi fl-indirizz il-qadim. X’inhi l-proċedura li wieħed għandu jsegwi f’dawn il-każijiet?

Il-persuni rreġistrati huma meħtieġa jinfurmaw lid-Dipartiment bi kwalunkwe bidla, inkluż bidla fl-indirizz, bidliet fid-dettalji li jidhru fuq l-applikazzjoni għar-reġistrazzjoni u l-waqfien jew it-trasferiment tan-negozju jew parti minnu, fi żmien ħmistax-il jum minn dik il-bidla.

 

L-informazzjoni pprovduta fit-tweġibiet għandha sservi biss bħala gwida u m’għandha l-ebda saħħa legali.Aġġornat l-Aħħar: 14/10/2022

Jekk inti persuna li twettaq attività ekonomika, irrispettivament mir-riżultat jew l-ambitu ta’ dik l-attività, allura inti meqjus bħala persuna taxxabbli. Taħt ċirkostanzi normali, inti meħtieġ tirreġistra għall-VAT skont l-Artikolu 10. Jekk il-fatturat annwali tiegħek ma jaqbiżx il-limitu stabbilit (ara hawn taħt) allura tista’ tagħżel li tirreġistra skont l-Artikolu 11 bħala persuna eżentata.

Persuni bbażati barra minn Malta jistgħu wkoll ikunu obbligati li jirreġistraw għall-VAT f’Malta jekk huma stess ikunu obbligati jħallsu l-VAT f’Malta fuq provvista meqjusa li sseħħ f’Malta.

 

Attività ekonomika tfisser attività mwettqa minn persuna, li mhijiex impjegata (ara l-Artikolu 5(5) għad-definizzjoni ta’ impjegat), u li tikkonsisti fi kwalunkwe waħda jew aktar minn dawn li ġejjin:

·         kwalunkwe kummerċ, negozju, professjoni jew vokazzjoni u l-forniment ta’ kwalunkwe servizz personali;

·         l-isfruttament ta’ proprjetà tanġibbli jew intanġibbli għall-fini li jinkiseb introjtu minnu fuq bażi kontinwa;

·         il-forniment minn klabb, assoċjazzjoni jew organizzazzjoni tal-faċilitajiet jew il-vantaġġi disponibbli għall-membri tagħha għal abbonament jew korrispettiv ieħor;

·         l-ammissjoni ta’ persuni fi kwalunkwe bini għal korrispettiv.

L-attivitajiet ta’ awtorità pubblika li tassumi funzjonijiet assenjati lilha bil-liġi m’għandhomx jitqiesu bħala attività ekonomika ħlief kif u sal-punt previst fl-Ewwel Skeda tal-Att dwar il-VAT u ħlief meta tali trattament bħala persuni mhux taxxabbli jwassal għal distorsjonijiet sinifikanti fil-kompetizzjoni.

 

Hemm tliet tipi ta’ Reġistrazzjonijiet għall-VAT kif ġej: (a) Jekk qed tforni oġġetti jew servizzi u l-fatturat annwali tiegħek jaqbeż il-limitu eżentat stabbilit hawn taħt, għandek tirreġistra għall-VAT skont l-Artikolu 10, li bih tkun obbligat li titlob il-VAT fuq il-provvisti taxxabbli tiegħek u tkun tista’ titlob lura l-VAT li ġġarrab waqt l-attività taxxabbli tiegħek taħt ċerti kundizzjonijiet.

Persuna rreġistrata skont l-Artikolu 10

·         ikollha numru tal-VAT bil-prefiss MT

·         ikollha toħroġ irċevuti fiskali jew fatturi tat-taxxa, skont il-każ, fuq il-provvisti kollha magħmula minnha

·         normalment tissottometti dikjarazzjoni tal-VAT għal perjodu tat-taxxa ta’ tliet xhur sa mhux aktar tard minn 6 ġimgħat wara t-tmiem tal-perjodu tat-taxxa, jew kif ordnat mill-Kummissarju.

(b) Jekk qed tforni oġġetti jew servizzi u l-fatturat annwali tiegħek ma jaqbiżx il-limitu tad-dħul stabbilit (ara hawn taħt), tista’ tirreġistra għall-VAT bħala eżentat skont l-Artikolu 11. F’dan il-każ ma titlobx il-VAT fuq il-provvisti tiegħek u ma tkunx tista’ titlob lura l-VAT li ġġarrab waqt l-attività ekonomika tiegħek. Madankollu, tista’ minflok tagħżel li tirreġistra għall-VAT skont l-Artikolu 10 biex tiċċarġja l-VAT u titlob tnaqqis tal-VAT imġarrba bil-mod normali. Jekk tiddeċiedi li tagħżel l-aħħar opzjoni, allura inti tkun meħtieġ tibqa’ taħt l-Artikolu 10 għal minimu ta’ sitta u tletin xahar. Huwa biss wara dak il-perjodu li tkun tista’ tirreġistra skont l-Artikolu 11 u sakemm il-limitu tal-ħruġ ma jinqabiżx.

Persuna rreġistrata skont l-Artikolu 11

·         ikollha numru ta’ identifikazzjoni mingħajr il-prefiss MT

·         ikollha toħroġ irċevuti fiskali fuq il-provvisti kollha magħmula minnha

·         tissottometti dikjarazzjoni (dikjarazzjoni tat-taxxa ssimplifikata) fl-aħħar ta’ kull sena kalendarja li trid tiġi sottomessa sal-15 ta’ Marzu tas-sena ta’ wara.

(c) Jekk inti persuna ġuridika mhux taxxabbli jew persuna taxxabbli mhux irreġistrata skont l-Artikolu 10, u tagħmel akkwisti intrakomunitarji ta’ oġġetti f’Malta li l-valur tagħhom jaqbeż l-€10,000 mill-bidu tas-sena, allura inti obbligat li tirreġistra għall-VAT skont l-Artikolu 12 u tħallas il-VAT f’Malta kull darba li tagħmel tali akkwisti intrakomunitarji.

Jekk inti rreġistrat taħt l-Artikolu 11 bħala persuna taxxabbli eżentata u għandek l-intenzjoni li tagħmel Akkwisti Intrakomunitarji u tħallas il-VAT fuqhom f’Malta, allura jeħtieġlek tirreġistra wkoll skont l-Artikolu 12 biex tikseb numru ta’ identifikazzjoni validu għal dan il-għan u tikkwalifika għal tali arranġament.

 

Il-limitu tad-dħul huwa l-ammont ta’ fatturat fis-sena li bih persuna tista’ tagħżel li tirreġistra bħala persuna eżentata skont l-Artikolu 11 (ara hawn fuq). Dan il-limitu jiddependi fuq jekk intix qed twettaq attivitajiet li jikkonsistu prinċipalment fil-provvista ta’ oġġetti jew attivitajiet oħra. Il-limitu tal-ħruġ jiġi applikat fil-każ fejn persuna li tkun irreġistrata skont l-Artikolu 10 tibdel ir-reġistrazzjoni tagħha għall-Artikolu 11 (eżentata). “Attivitajiet oħra” tirreferi għal-limitu għal persuni li l-attività ekonomika tagħhom tikkonsisti prinċipalment fil-provvista ta’ servizz.  

Il-limiti differenti huma kif ġej:

Attività Ekonomika

Limitu tad-Dħul

Limitu tal-Ħruġ

Attività ekonomika li tikkonsisti prinċipalment mill-provvista ta’ oġġetti

€35,000

€28,000

Attivitajiet ekonomiċi oħra

€30,000

€24,000

 

Meta persuna rreġistrata skont l-Artikolu 11 tipprovdi kemm oġġetti kif ukoll servizzi, il-limitu applikabbli għandu jiġi ddeterminat skont in-natura prinċipali tal-provvista, filwaqt li jitqies il-valur totali tal-provvisti kollha.​

Il-fatturat ta’ negozju huwa l-valur totali tal-bejgħ, eskluż:

·         Provvisti eżentati mingħajr kreditu

·         It-trasferiment ta’ negozju bħala negozju avvjat

·         Il-bejgħ ta’ assi fissi

·         Provvisti magħmula lin-negozju u meqjusa li jsiru minn dak in-negozju skont id-dispożizzjonijiet tar-reverse charge

Il-limiti għal kull attività ekonomika li tappartjeni għall-istess kategorija huma assenjati mid-Dipartiment u japplikaw b’mod ġenerali għal dik il-kategorija.

 

Kopja tal-Karta tal-Identità/Passaport tal-applikant, jew fil-każ ta’ Kumpanija b’Responsabbiltà Limitata, tar-rappreżentant awtorizzat vestit bir-rappreżentanza legali trid tiġi ppreżentata fil-ħin tar-reġistrazzjoni. Fil-każ ta’ kumpanija b’responsabbiltà limitata jew sħubija reġistrata, għandha tiġi ppreżentata kopja tal-Memorandum u l-Istatut ta’ Assoċjazzjoni.

 

Ir-reġistrazzjoni għall-finijiet tal-VAT għandha ssir online permezz tas-Servizzi tar-Reġistrazzjonijiet tas-CFR Online. Ġeneralment tkun meħtieġa e-ID Maltija biex taċċessa s-Servizzi tas-CFR Online.

Madankollu jingħata aċċess lil persuni li ma jkollhomx e-ID jekk tali persuni ma jistax ikollhom e-ID. F’dawn il-każijiet, jekk jogħġbok segwi din il-gwida.

 

Dan jiddependi mit-tip ta’ reġistrazzjoni tal-persuna.

Reġistrazzjoni tal-VAT skont l-Artikolu 10: Dikjarazzjoni tal-VAT għal kull perjodu tal-VAT għandha tiġi sottomessa lill-Kummissarju tat-Taxxa sa xahar u 15-il jum mit-tmiem tal-perjodu tal-VAT rispettiv. Il-perjodu tal-VAT tipikament allokat lil persuna rreġistrata skont l-Artikolu 10 ikun perjodu ta’ 3 xhur kalendarji. Japplikaw eċċezzjonijiet fejn perjodu tat-taxxa jista’ jkun ta’ aktar jew inqas minn 3 xhur. Perjodu ta’ 12-il xahar tal-VAT japplika fejn il-valur tal-bejgħ magħmul ma jaqbiżx il-“Limitu tal-Ħruġ” rilevanti kif speċifikat fis-Sitt Skeda tal-Att dwar il-VAT. Jistgħu jiġu applikati wkoll perjodi tal-VAT ta’ kull xahar fid-diskrezzjoni tal-Kummissarju tat-Taxxa.

Reġistrazzjoni tal-VAT skont l-Artikolu 11: Dikjarazzjoni perjodika li tkopri perjodu kalendarju ta’ 12-il xahar għandha tiġi sottomessa lill-Kummissarju tat-Taxxa sa xahar u 15-il jum mit-tmiem tal-perjodu kalendarju ta’ 12-il xahar.

Reġistrazzjoni tal-VAT skont l-Artikolu 12:  Id-dikjarazzjonijiet ta’ akkwisti intrakomunitarji ta’ oġġetti magħmula li għalihom il-persuna hija obbligata tħallas il-VAT hija stess f’Malta għandhom jiġu sottomessi lill-Kummissarju tat-Taxxa sa mhux aktar tard minn 15-il jum mill-aħħar tax-xahar li fih ikun seħħ tali akkwist. Id-dikjarazzjonijiet tax-xiri ta’ servizzi li għalihom il-persuna hija obbligata tħallas il-VAT hija stess f’Malta għandhom jiġu sottomessi lill-Kummissarju tat-Taxxa sa mhux aktar tard minn xahar u 15-il jum mill-aħħar tax-xahar li fih jiġi riċevut is-servizz (jew ix-xahar meta tinħareġ fattura tat-taxxa, jekk tali fattura tinħareġ fi żmien 15-il jum mit-tmiem tax-xahar li fih jiġi riċevut is-servizz).

(Jekk jogħġbok innota li din l-informazzjoni tipprovdi biss gwida ġenerali għal applikazzjoni ġenerali u ma tissostitwixxix id-dispożizzjonijiet tal-leġiżlazzjoni tal-VAT.)

 

Il-proċess elettroniku għad-Dikjarazzjoni tal-VAT jieħu madwar 15-il minuta biex jitlesta.

Gwida b’rabta mar-regoli għar-Rifużjonijiet tal-VAT lil persuni taxxabbli mhux stabbiliti fl-Istat Membru ta’ rifużjoni iżda stabbiliti fi Stat Membru ieħor tista’ tinstab hawn.

 

Il-proċess tal-verifika u l-ipproċessar tas-sottomissjoni jieħu perjodu massimu ta’ 90 jum ta’ xogħol. JEKK RIFUŻJONI DOVUTA LILEK MA TITĦALLASX FIL-ĦIN, ALLURA INTI TITĦALLAS IMGĦAX TA’ 0.33% FIX-XAHAR (L.S. 406.19).

 

Il-proċess elettroniku għar-Rifużjoni tal-VAT (it-8 Direttiva) jieħu madwar 20 minuta biex jitlesta.

 

Il-proċess tal-verifika u l-ipproċessar tas-sottomissjoni jieħu perjodu massimu ta’ 4 xhur. JEKK RIFUŻJONI DOVUTA LILEK MA TITĦALLASX FIL-ĦIN, ALLURA INTI TITĦALLAS IMGĦAX TA’ 0.33% FIX-XAHAR.

 

Jekk qed topera taħt il-limitu u għażilt li tiġi kklassifikat bħala persuna eżentata, int għandek id-dmir li tinforma lid-Dipartiment li m’għadekx tikkwalifika biex tiġi kklassifikat bħala eżentat malli jsir ovvju li se taqbeż il-limitu applikabbli.

Dan tista’ tasal għalih billi tikkalkula l-fatturat annwali għat-tnax-il xahar ta’ qabel fi tmiem kull trimestru kalendarju. Meta jirriżulta li l-limitu applikabbli qed jinqabeż, għandek tinforma lid-Dipartiment fi żmien tletin jum minn meta dan iseħħ, u l-VAT trid tinġabar immedjatament wara li jiskadi dan il-perjodu.

 

Jekk l-attività kummerċjali l-ġdida se tiżdied ma’ attivitajiet kummerċjali oħra li wettaqt taħt numru tal-VAT, l-istess numru għandu jintuża għall-attività l-ġdida. Madankollu għandek tinforma lid-Dipartiment bil-miktub dwar in-natura tal-attività kummerċjali l-ġdida.

Jekk l-attività kummerċjali l-ġdida tkun se titwettaq taħt kumpanija ġdida b’responsabbiltà limitata stabbilita biex twettaq tali attività, ikun meħtieġ numru ta’ reġistrazzjoni ġdid.

 

Le, mhux se jkollok għalfejn terġa’ tirreġistra. Inti se tuża l-istess numru tal-VAT iżda jeħtieġ li tavża lid-Dipartiment dwar dan l-avveniment, billi tagħti d-dettalji pertinenti kollha bħall-Isem u l-indirizz tal-fergħa l-ġdida, iż-żieda fin-numru ta’ impjegati u ż-żieda stmata tal-fatturat tan-negozju tiegħek.

 

Jekk inti kummerċjant waħdieni allura inti meħtieġ li tittermina r-reġistrazzjoni tan-negozju tiegħek filwaqt li ibnek, jew kwalunkwe persuna li tieħu f’idejha n-negozju tiegħek trid tagħmel applikazzjoni ġdida għar-reġistrazzjoni tal-VAT, sakemm dik il-persuna ma tkunx diġà rreġistrata għall-VAT.

Madankollu, jekk in-negozju huwa Kumpanija b’responsabbiltà limitata, allura t-trasferiment għandu jitwettaq permezz tal-Awtorità tas-Servizzi Finanzjarji ta’ Malta (MFSA), u d-Dipartiment tal-VAT għandu jiġi avżat dwar il-bidla fid-Diretturi u l-Azzjonisti tal-Kumpanija, permezz ta’ kopja ċċertifikata tal-memoranda pprovduti mill-istess MFSA.

 

Sabiex tittermina r-reġistrazzjoni tal-VAT inti trid iċċempel lit-Taqsima tal-Customer Care tad-Dipartiment biex timla l-formola xierqa. Applikazzjoni għad-dereġistrazzjoni ma tistax tiġi pproċessata sakemm ma jkollokx id-dikjarazzjonijiet tal-VAT u l-pagamenti kollha aġġornati, u kwalunkwe kwistjoni pendenti riżolta mad-Dipartiment.

Ta’ min jinnota li jekk inti rreġistrat bħala mhux eżentat (skont l-Artikolu 10) inti titqies li fornejt lilek innifsek l-assi kollha tan-negozju li fadal li jappartjenu għan-negozju tiegħek, immedjatament qabel il-kanċellazzjoni tar-reġistrazzjoni tiegħek. F’dan ir-rigward għalhekk trid tagħti rendikont tal-VAT dovuta fuqhom fl-aħħar dikjarazzjoni tal-VAT tiegħek.

 

Biex tittermina r-reġistrazzjoni l-ewwel trid issolvi l-kwistjonijiet pendenti kollha mad-Dipartiment. Jekk tkompli tirċievi formoli tal-VAT u rendikonti tal-bilanċ ta’ kull xahar wara li tkun applikajt għad-dereġistrazzjoni, għandek iċċempel lit-Taqsima tal-Customer Care tad-Dipartiment matul il-ħinijiet tal-uffiċċju biex tistaqsi dwar is-sitwazzjoni tiegħek. L-uffiċjali tad-dipartiment jiggwidawk skont il-bżonn.

Ladarba l-kwistjonijiet pendenti kollha jkunu ġew solvuti, inkluż il-ħlas ta’ kwalunkwe ammont pendenti dovut lid-Dipartiment, l-azzjoni għad-dereġistrazzjoni tiġi ffinalizzata.

 

Sabiex terġa’ tattiva n-numru ta’ reġistrazzjoni tal-VAT l-antik tiegħek għandek tinforma lid-Dipartiment bil-miktub fejn tagħmel it-talba tiegħek. In-numru tar-reġistrazzjoni tal-VAT u n-Numru tal-Karta tal-Identità tiegħek għandhom ikunu inklużi fl-ittra tiegħek.

 

Il-VAT tal-input hija l-VAT li titħallas mill-operatur kummerċjali għal oġġetti u servizzi li jirċievi matul l-attività ekonomika tiegħu. Il-VAT tal-output hija l-VAT li jitlob l-operatur kummerċjali meta huwa jforni oġġetti jew servizzi lill-klijenti tiegħu.

 

F’Malta, l-oġġetti u s-servizzi huma ġeneralment taxxabbli b’rata standard tal-VAT ta’ 18%.

Madankollu, ċerti oġġetti u servizzi għandhom rata mnaqqsa ta’ 7% jew 5% jew 0%.

Provvisti li huma taxxabbli b’7% huma:

·         L-akkomodazzjoni f’lukanda jew guest house

·         L-akkomodazzjoni fi kwalunkwe bini, fejn għall-fini ta’ dik l-akkomodazzjoni, ikun meħtieġ li l-bini jkun liċenzjat skont l-Att dwar Servizzi tal-Ivvjaġġar u tat-Turiżmu għal Malta.

·      Użu ta’ faċilitajiet sportivi

Provvisti li huma taxxabbli b’5% huma:

·         Provvista ta’ elettriku

·         Ħelu u oġġetti oħra li jittieklu

·         Aċċessorji Mediċi

·         Materja Stampata

·         Ċerti Oġġetti għall-użu esklussiv ta’ persuni b’diżabilità

·         Tiswija minuri ta’ roti, żraben u oġġetti tal-ġilda, ħwejjeġ u bjankerija tad-dar (inkluż tiswija u alterazzjoni)

·         Servizzi ta’ kura domestika bħal għajnuna u kura fid-dar għat-tfal, l-anzjani, il-morda jew il-persuni b’diżabilità

·         Dħul f’mużewijiet, wirjiet tal-arti, kunċerti u teatri.

·         Servizzi relatati mill-qrib mal-apparat dijanjostiku tal-COVID-19​

Il-provvisti li ġejjin għandhom rata ta’ 0% (jiġifieri eżentati bi kreditu, fejn l-ebda VAT ma tiġi imposta fuq il-valur tal-provvista iżda l-persuna rreġistrata hija intitolata li titlob lura l-VAT tal-input imġarrba fil-forniment ta’ dik il-provvista)

·         Ikel għall-konsum mill-bniedem

·         Prodotti farmaċewtiċi

·         Servizz skedat tal-karozzi tal-linja

·         Trasport domestiku tal-passiġġieri fuq il-baħar bejn il-gżejjer

·         Trasport internazzjonali tal-passiġġieri

·         Esportazzjonijiet

·         Provvisti intrakomunitarji ta’ oġġetti

(Jekk jogħġbok żomm f’moħħok li din l-informazzjoni ma tissostitwixxix id-dispożizzjonijiet tal-leġiżlazzjoni dwar il-VAT. Din il-lista mhix eżawrjenti u jkun xieraq li tirreferi għal-leġiżlazzjoni dwar il-VAT)

Il-provvisti li ġejjin huma eżentati mingħajr kreditu, fejn ma tiġi imposta l-ebda VAT fuq il-valur tal-provvista iżda l-fornitur mhuwiex intitolat li jitlob lura l-VAT tal-input imġarrba fil-forniment ta’ dik il-provvista. F’dan il-każ il-fornitur mhuwiex meħtieġ jirreġistra mad-Dipartiment.

·         Provvista ta’ ilma minn Awtorità Pubblika

·         Provvista ta’ bini u art għall-bini

·         Provvista ta’ servizzi tas-Saħħa u l-Benesseri

·         Provvista ta’ servizzi finanzjarji u tal-assigurazzjoni

·         Il-kiri ta’ proprjetà immobbli huwa eżentat mingħajr kreditu ħlief fis-sitwazzjonijiet li ġejjin:

o   Kiri għal skopijiet ta’ akkomodazzjoni fi kwalunkwe lukanda jew guest house jew stabbiliment simili jew fi kwalunkwe kamp tal-vaganzi jew sit tal-ikkampjar (b’7%)

o   Kiri ta’ akkomodazzjoni f’appartamenti tal-vaganzi meħtieġa li jkunu liċenzjati skont Att dwar Servizzi tal-Ivvjaġġar u tat-Turiżmu għal Malta (b’7%)

o   Il-kiri ta’ proprjetà immobbli minn kumpanija b’responsabbiltà limitata lil persuna rreġistrata għall-attività ekonomika ta’ dik il-persuna rreġistrata (bi 18%)

(Jekk jogħġbok żomm f’moħħok li din l-informazzjoni ma tissostitwixxix id-dispożizzjonijiet tal-leġiżlazzjoni dwar il-VAT. Din il-lista mhix eżawrjenti u jkun xieraq li tirreferi għal-leġiżlazzjoni dwar il-VAT)

 

L-ammont tal-fatturat taxxabbli għall-VAT, jiġifieri l-valur taxxabbli ta’ provvista, huwa ddeterminat skont is-Seba’ Skeda tal-Att dwar il-VAT. Bħala regola ġenerali, il-valur taxxabbli ta’ provvista huwa l-valur riċevut jew riċevibbli mill-fornitur bi tpattija għall-provvista magħmula lill-klijent. Dan jinkludi kwalunkwe sussidju direttament marbut ma’ dik il-provvista iżda jeskludi l-VAT.

Il-valur taxxabbli ta’ provvista għandu jinkludi taxxi, dazji, imposti, tariffi u ħlasijiet oħra relatati ma’ dik il-provvista u wkoll spejjeż inċidentali bħal kummissjonijiet u spejjeż tal-ippakkjar, tat-trasport u tal-assigurazzjoni mitluba mill-fornitur lix-xerrej (anki jekk ikunu koperti minn ftehim/dokument separat)

Il-valur taxxabbli ta’ provvista jeskludi: 

   a)  tnaqqis fil-prezz fil-forma ta’ skontijiet għal ħlas bikri;

   b)  ribassi u tnaqqis ieħor fil-prezz 

   c)  penali u imgħax għal ħlas tard

   d)  ċerti żborżamenti mħallsa f’isem u minħabba l-klijent

   e)  depożiti fuq ippakkjar ritornabbli fejn id-depożitu jkun inqas mill-ispiża tal-ippakkjar.

Jekk il-ħlas isir parzjalment jew kompletament in natura, jew meta l-valur tal-ħlas għal provvista ma jistax jiġi ddeterminat, il-porzjon tal-valur taxxabbli ta’ dik il-provvista li ma jistax jiġi ddeterminat għandu jkun il-valur tas-suq miftuħ tiegħu. Il-valur tas-suq miftuħ huwa l-prezz li l-oġġett jew is-servizz sottostanti jikseb jekk jinbiegħ fis-suq miftuħ fid-data u fl-istat li kien fih meta l-oġġett imsemmi jiġi kkonsenjat jew meta s-servizzi jitwettqu.

(Jekk jogħġbok innota li din l-informazzjoni tipprovdi biss gwida ġenerali għal applikazzjoni ġenerali u ma tissostitwixxix id-dispożizzjonijiet tal-leġiżlazzjoni tal-VAT.)

 

Meta n-natura tal-użu tal-proprjetà li fuqha ntalbet il-VAT tal-input tkun inbidlet minn taxxabbli jew eżentata b’operazzjoni ta’ kreditu għal eżentata mingħajr kreditu, parti waħda minn dik il-VAT tal-input mitluba għandha titħallas lura lid-Dipartiment permezz ta’ aġġustament fid-dikjarazzjoni tal-VAT. Dan l-aġġustament għandu jsir fi żmien għoxrin sena għal proprjetà immobbli u fi żmien ħames snin għal kwalunkwe proprjetà oħra.

Pereżempju: jekk lukanda (attività taxxabbli) tinbidel għal dar tal-anzjani (eżentata mingħajr kreditu), parti mill-VAT tal-input li ntalbet ikollha titħallas lura lid-Dipartiment. Fir-rigward tal-proprjetà immobbli dan għandu jinħadem bħala proporzjon għal perjodu ta’ għoxrin sena, jiġifieri jekk il-bidla fl-attività ekonomika sseħħ wara għaxar snin, nofs il-VAT tal-input oriġinali mitluba trid tiġi rrimborżata.

 

Sabiex jiġi ddeterminat jekk il-VAT tal-input imġarrba fuq provvisti magħmula barra minn Malta tistax tintalab lura jew le, wieħed irid jistabbilixxi jekk dawn, kieku saru f’Malta, kinux jiġu ttrattati bħala provvisti taxxabbli jew provvisti eżentati bi kreditu.

Jekk iva, il-valur ta’ dawn il-provvisti għandu jiġi inkluż fid-dikjarazzjoni tal-VAT bħala provvisti eżentati bi kreditu.

Jekk ma jeżisti l-ebda dritt li titlob lura l-VAT tal-input, il-valur tagħhom għandu jiġi inkluż fid-dikjarazzjoni tal-VAT bħala provvisti eżentati mingħajr kreditu.

 

Persuni li huma rreġistrati għall-VAT skont l-Artikolu 10 (jiġifieri ma għażlux li jiġu kklassifikati bħala persuni eżentati) huma intitolati li jitolbu lura tant mill-VAT tal-input li hija attribwibbli għal provvisti taxxabbli, provvisti eżentati bi kreditu, provvisti magħmula barra minn Malta li, kieku dawn saru f’Malta, kienu jiġu kklassifikati bħala provvisti taxxabbli jew provvisti eżentati bi kreditu, u provvisti magħmula barra minn Malta li huma eżentati mingħajr kreditu skont il-leġiżlazzjoni Maltija dwar il-VAT iżda huma soġġetti għall-VAT barra minn Malta.

Meta l-attività ekonomika ta’ persuna rreġistrata tikkonsisti f’taħlita ta’ provvisti taxxabbli/eżentati bi kreditu u provvisti eżentati mingħajr kreditu, il-VAT tal-input ikollha titqassam billi jintuża jew il-metodu dirett ta’ attribuzzjoni jew il-metodu ta’ attribuzzjoni parzjali.

Meta l-metodi ta’ hawn fuq ma jagħtux riżultat ġust u raġonevoli, il-Kummissarju għandu s-setgħa li jiddeċiedi dwar il-perċentwal tal-attribuzzjoni.

Madankollu, skont id-dispożizzjonijiet tal-leġiżlazzjoni, ċerta VAT tal-input imġarrba fuq ċerti provvisti hija mblukkata u ma tistax tintalab lura anki meta tkun imġarrba fuq spejjeż relatati mal-attività ekonomika.

 

Persuni li jipprovdu provvisti eżentati mingħajr kreditu (eż. kumpaniji tal-assigurazzjoni u servizzi tal-edukazzjoni u tas-saħħa u soċjali), u persuni li huma kklassifikati bħala persuni eżentati ma jistgħux jitolbu lura l-VAT tal-input imġarrba fuq xiri relatat man-negozju tagħhom.

L-ebda VAT tal-input ma tista’ tintalab fuq il-provvisti li ġejjin anki meta tali provvisti jinxtraw in konnessjoni mal-attività ekonomika ta’ persuna rreġistrata, jiġifieri VAT tal-input imġarrba fuq:

·         Tabakk jew prodotti tat-tabakk, sakemm ma jinxtrawx għall-bejgħ mill-ġdid

·         Xorb alkoħoliku, sakemm ma jinxtrawx għall-bejgħ mill-ġdid

·         Xogħlijiet tal-arti u antikitajiet, jiġifieri pitturi, tpinġijiet u pastelli eżegwiti bl-idejn, minbarra oġġetti manifatturati miżbugħa bl-idejn jew imżejna bl-idejn; inċiżjonijiet, stampi u litografi oriġinali; skulturi u statwi oriġinali, ta’ kwalunkwe materjal; antikitajiet ta’ aktar minn mitt sena; kollezzjonijiet u biċċiet ta’ kollezzjoni ta’ interess żooloġiku, botaniku, mineraloġiku, anatomiku, storiku, arkeoloġiku, paleontoloġiku u etnografiku, sakemm ma jinxtrawx għall-bejgħ mill-ġdid

·         Vetturi bil-mutur, bastimenti jew inġenji tal-ajru, esklużi bastimenti u inġenji tal-ajru akkwistati għall-fini li jiġu pprovduti skont ftehim ta’ charter jew ta’ kiri, sakemm ma jinxtrawx għall-bejgħ mill-ġdid jew sakemm ma jinxtrawx u jintużaw għall-fini tat-trasport ta’ merkanzija jew passiġġieri għal korrispettiv.

·        Oġġetti u servizzi għall-fini tat-tiswija, il-manutenzjoni u ż-żamma ta’ vetturi bil-mutur, bastimenti jew inġenji tal-ajru u fjuwil użat għalihom fejn il-VAT fuq il-vetturi bil-mutur, il-bastimenti jew l-inġenji tal-ajru rispettivi nfushom hija jew tkun imblukkata.​

·         Kiri ta’ karozza minn lokatarju, inkluża l-VAT imġarrba fuq il-fjuwil

·         Il-provvista ta’ kwalunkwe oġġett u servizz użat fil-provvista ta’ riċevimenti, divertiment jew ospitalità ħlief meta dik il-provvista ssir waqt l-attività ekonomika normali

·         Il-provvista ta’ oġġetti u servizzi użati fil-forniment ta’ trasport jew divertiment minn persuna lill-impjegati tagħha, ħlief fejn it-trasport huwa pprovdut fuq vetturi b’kapaċità ta’ mhux inqas minn seba’ postijiet.

 

Iva, sakemm il-vettura tkun vettura kummerċjali u tintuża fit-twettiq tal-attività ekonomika tiegħek. Id-Dipartiment jista’ madankollu, wara li jivverifika u jivvaluta fatturi bħalma huma l-proporzjon tal-użu “għan-negozju” mal-użu “privat”; il-firxa tal-fatturat iddikjarat tiegħek vis-a-vis l-ispiża kapitali fix-xiri tal-vettura u l-ħtieġa għax-xiri tal-vettura b’rabta mat-tip ta’ attività ekonomika tiegħek eċċ., jaġġusta t-talba tiegħek għall-VAT tal-input kif jidhirlu meħtieġ.

Il-liġi tal-VAT tikkunsidra bħala vetturi kummerċjali, vetturi bil-mutur iddisinjati prinċipalment għat-trasport ta’ oġġetti b’postijiet bilqiegħda normalment maġenb is-sewwieq u li normalment mhumiex adattati għat-trasport ta’ passiġġieri, jew b’akkomodazzjoni bilqiegħda għal disa’ persuni jew aktar.

 

It-tobba, il-kontabilisti u professjonisti oħra huma intitolati għar-rifużjoni tal-VAT imħallsa fuq vetturi u fjuwil?

Il-provvista ta’ servizzi mediċi hija kklassifikata bħala eżentata mingħajr kreditu u għalhekk it-tobba ma jitolbux VAT u mhumiex permessi kwalunkwe kreditu fuq il-VAT tal-input li jġarrbu.

Il-kontabilisti u professjonisti oħra mhumiex intitolati li jitolbu lura l-VAT imħallsa fuq ix-xiri ta’ vettura u dik imħallsa fuq il-fjuwil.

 

Fattura tat-taxxa trid tinħareġ meta persuna rreġistrata skont l-Artikolu 10 tagħmel provvista lil persuna rreġistrata oħra.

Irċevuta fiskali trid tinħareġ meta persuna rreġistrata tagħmel provvista lil persuna mhux irreġistrata.

 

Fatturi tat-Taxxa

Fattura tat-taxxa maħruġa minn persuna rreġistrata li mhijiex ikklassifikata bħala persuna eżentata għandu jkun fiha l-informazzjoni li ġejja:

·         id-data tal-ħruġ;

·         numru sekwenzjali, ibbażat fuq serje waħda jew aktar, li jidentifika b’mod uniku l-fattura;

·         l-isem u l-indirizz tal-fornitur u n-numru ta’ identifikazzjoni tal-VAT li bih tkun għamlet il-provvista;

·         l-isem u l-indirizz tal-persuna li lilha ssir il-provvista u n-numru ta’ identifikazzjoni tal-VAT li bih il-klijent akkwista l-oġġetti jew is-servizzi fornuti lilu;

·         il-kwantità u n-natura tal-oġġetti fornuti jew il-firxa u n-natura tas-servizzi mogħtija;

·         id-data li fiha saret jew tlestiet il-provvista jew id-data li fiha sar ħlas minħabba l-provvista sa fejn dik id-data tista’ tiġi ddeterminata u tvarja mid-data tal-ħruġ tal-fattura;

·         il-valur taxxabbli għal kull rata jew eżenzjoni, il-prezz ta’ unità eskluż it-taxxa u kwalunkwe skont jew ribass jekk ma jkunux inklużi fil-prezz ta’ unità;

·         ir-rata tal-VAT applikata;

·         l-ammont tal-VAT pagabbli, ħlief meta jiġi applikat arranġament speċjali;

·         meta l-persuna obbligata li tħallas il-VAT tkun rappreżentant tat-taxxa fi Stat Membru ieħor, in-numru ta’ identifikazzjoni tal-VAT ta’ dak ir-rappreżentant tat-taxxa, flimkien mal-isem sħiħ u l-indirizz tiegħu;

·         meta l-VAT issir taxxabbli fiż-żmien meta jiġi riċevut il-pagament, il-kliem “Kontabilità abbażi tal-ħlasijiet”;

·         meta l-klijent li jirċievi provvista joħroġ il-fattura minflok il-fornitur, il-kliem “Awtofatturar”;

·         meta fattura tat-taxxa tirreferi għal provvisti li mhumiex taxxabbli, din għandha tagħmel referenza fil-qosor għad-dispożizzjonijiet rilevanti tal-Att dwar il-VAT, jew id-dispożizzjonijiet xierqa tad-Direttiva tal-Kunsill 2006/112/KE, jew kwalunkwe indikazzjoni oħra li fuq il-bażi tagħha l-ebda taxxa mhija imposta;

·         meta l-klijent ikun obbligat iħallas il-VAT, il-kliem “Reverse charge”;

·         meta tiġi applikata l-iskema ta’ marġni għall-aġenti tal-ivvjaġġar, il-kliem “Skema ta’ marġni – Aġenti tal-ivvjaġġar”;

·         meta jiġi applikat wieħed mill-arranġamenti speċjali applikabbli għal oġġetti użati, xogħlijiet tal-arti, oġġetti u antikitajiet ta’ kollezzjoni, il-kliem “Skema ta’ marġni – Oġġetti użati”; “Skema ta’ marġni – Xogħlijiet tal-arti” jew “Skema ta’ marġni – Oġġetti u antikitajiet ta’ kollezzjoni” rispettivament;

·         f’fattura għall-provvista intrakomunitarja ta’ mezz ġdid ta’ trasport, id-deskrizzjoni tal-oġġett fornut għandu jkun fiha d-dettalji msemmija fid-definizzjoni ta’ “mezzi ġodda ta’ trasport” fl-Att dwar il-VAT.

 

Fil-każ ta’ tranżazzjoni lokali fejn il-persuna taxxabbli obbligata li tħallas il-VAT ma tkunx obbligata tħallas il-VAT u l-ammont tal-fattura inkluża t-taxxa ma jkunx ogħla minn €100, jew meta l-persuna rreġistrata li tkun qed tagħmel il-provvista tkun persuna eżentata, tista’ tintuża fattura simplifikata. Din il-fattura simplifikata għandu jkun fiha mill-inqas id-dettalji li ġejjin:

·         id-data tal-ħruġ;

·         numru sekwenzjali, ibbażat fuq serje waħda jew aktar, li jidentifika b’mod uniku l-fattura;

·         l-isem, l-indirizz u n-numru ta’ identifikazzjoni tat-Taxxa fuq il-Valur Miżjud tal-fornitur;

·         in-numru ta’ identifikazzjoni tat-Taxxa fuq il-Valur Miżjud tal-persuna li lilha ssir il-provvista;

·         deskrizzjoni suffiċjenti biex tidentifika l-oġġetti u s-servizzi pprovduti;

·         l-ammont totali tat-taxxa pagabbli jew l-informazzjoni meħtieġa għall-kalkolu tagħha;

·         meta l-fattura maħruġa tkun dokument jew messaġġ ittrattat bħala fattura, referenza speċifika u ċara għal dik il-fattura inizjali u d-dettalji speċifiċi li qed jiġu emendati.

 

Il-bejjiegħa bl-imnut u l-persuni li l-attività tagħhom tikkonsisti fil-provvista ta’ ikel waqt il-catering (eż. ristoranti u snack bars) iridu joħorġu rċevuta fiskali permezz ta’ cash register fiskali.

Il-fornituri tas-servizzi jridu joħorġu rċevuta fiskali manwali minn kotba tal-irċevuti fiskali manwali pprovduti mid-Dipartiment mal-applikazzjoni.

Il-Cash Register Fiskali u l-irċevuti fiskali manwali għandhom jinżammu fil-bini fejn tkun se ssir l-attività ekonomika.

Is-sewwieqa tat-taksi jridu joħorġu l-irċevuti fiskali permezz ta’ tassimetru fiskali.

Il-persuni rreġistrati li jkunu beħsiebhom jużaw l-irċevuti kompjuterizzati jridu jiksbu l-approvazzjoni minn qabel bil-miktub mid-Dipartiment. Mal-approvazzjoni, in-numru ta’ eżenzjoni maħruġ mid-Dipartiment irid jintwera fuq l-irċevuta, jew b’mezz elettroniku.

Il-biljetti tad-dħul għall-avvenimenti jistgħu jiġu aċċettati wkoll bħala rċevuti fiskali sakemm tintalab approvazzjoni bil-miktub minn qabel mid-Dipartiment. In-numru tal-permess tal-VAT maħruġ mid-Dipartiment għandu jintwera fuq il-biljett.

 

Irċevuta fiskali titqies bħala tali meta tinħareġ f’waħda mis-sitwazzjonijiet li ġejjin:

·         Permezz ta’ cash register fiskali approvata

·         Fuq il-kotba tal-irċevuti fiskali manwali pprovduti mid-Dipartiment

·         Permezz ta’ sistema kompjuterizzata jew elettronika jew sistema ta’ punt ta’ bejgħ, sakemm tkun inkisbet approvazzjoni minn qabel mid-Dipartiment u n-numru ta’ eżenzjoni maħruġ mid-Dipartiment ikun stampat fuq l-irċevuta

·         B’applikazzjoni u wara l-approvazzjoni mid-Dipartiment, il-biljetti tad-dħul għal avveniment jistgħu jiġu approvati bħala rċevuti fiskali sakemm l-informazzjoni kif meħtieġa bil-miktub mid-Dipartiment tkun stampata fuq kull biljett

·         Permezz ta’ tassimetru fiskali.

 

Il-persuni li jipprovdu provvisti eżentati mingħajr kreditu mhumiex meħtieġa joħorġu rċevuti fiskali, għalkemm xorta huma obbligati joħorġu rċevuta ordinarja skont leġiżlazzjoni oħra eżistenti.

Dawn il-persuni mhumiex meħtieġa jirreġistraw mad-Dipartiment.

 

Trid toħroġ irċevuta fiskali. L-irċevuti fiskali għandhom dejjem jinħarġu għal provvisti ta’ oġġetti jew servizzi lil persuni li huma eżentati mingħajr kreditu. Ma jimpurtax jekk il-fornitur huwiex persuna rreġistrata mhux eżentata jew persuna rreġistrata eżentata.

 

Bejjiegħ bl-imnut u persuna li tipprovdi l-ikel waqt il-catering (eż. ristorant jew snack bar) għandhom dejjem joħorġu rċevuta fiskali għal kull provvista magħmula (ħlief fil-każijiet fejn il-leġiżlazzjoni tippermetti li ċerti provvisti jkunu koperti minn irċevuta fiskali li tinħareġ fl-aħħar tal-ġurnata biex tkopri l-provvisti magħmula matul dik il-ġurnata). Dan jgħodd kemm għall-provvisti taxxabbli kif ukoll għall-provvisti eżentati bi kreditu.

Meta bejjiegħ bl-imnut jagħmel provvista taxxabbli lil persuna oħra rreġistrata, din tal-aħħar tista’ titlob lill-bejjiegħ bl-imnut biex joħroġ fattura tat-taxxa minflok irċevuta fiskali.

Irċevuta fiskali maħruġa permezz ta’ cash register fiskali tista’ tiġi aċċettata bħala fattura tat-taxxa jekk tinkludi d-dettalji ta’ hawn fuq li huma meħtieġa f’fattura tat-taxxa.

 

Jekk ikun hemm qtugħ fl-elettriku, persuna rreġistrata trid toħroġ irċevuta fiskali manwali għal kull provvista magħmula.

L-istess japplika meta l-cash register jkollha xi ħsara. Madankollu, il-persuna rreġistrata kkonċernata hija obbligata li tiżgura li l-cash register fiskali tagħha tissewwa fl-iqsar żmien possibbli.

 

Meta bejjiegħ bl-imnut li jkun ikklassifikat bħala persuna eżentata joħroġ irċevuta fiskali permezz ta’ cash register fiskali fuq il-bejgħ ta’ provvista li kienet tkun taxxabbli li kieku ma kinitx għal dik il-klassifikazzjoni, ir-rata tat-taxxa li għandha tiġi indikata fuq dik l-irċevuta fiskali għandha tkun “F” u mhux “E”.

 

Iva, il-kategoriji ta’ negozju murija hawn taħt huma intitolati li joħorġu irċevuta fiskali waħda fl-aħħar tal-ġurnata biex ikopru l-bejgħ ta’ provvisti magħmula matul il-ġurnata:

·         Persuni rreġistrati li jagħmlu provvisti ta’ gass, ħalib u prodotti tal-ħalib jew ħobż minn vettura jew permezz ta’ kunsinna bieb bieb jew lill-pubbliku ġenerali fi triq pubblika.

·         Persuna rreġistrata li tagħmel provvisti ta’ fjuwil minn pompi.

·         Persuna rreġistrata li tagħmel provvisti ta’ ikel u xorb li jinsabu f’żona ta’ xogħol jew studju, wara li l-awtorizzazzjoni tkun intalbet u ngħatat bil-miktub mid-Dipartiment biex toħroġ irċevuta fiskali waħda fl-aħħar tal-ġurnata biex tkopri provvisti ta’ ikel magħmula matul dik il-ġurnata u rċevuta fiskali oħra biex tkopri provvisti ta’ xorb magħmula matul dik il-ġurnata.

·         Persuna rreġistrata li tagħmel provvisti ta’ ħobż mill-forn fejn dak il-ħobż ikun ġie moħmi.

Fil-każ tal-persuni rreġistrati msemmija taħt it-tielet u r-raba’ punti hawn fuq, id-Dipartiment jista’, fi kwalunkwe ħin, jirtira l-awtorizzazzjoni permezz ta’ avviż bil-miktub.

 

Inti trid iżżomm ir-rekords u d-dokumenti li ġejjin:

·         Kopji tal-Irċevuti Fiskali maħruġa

·         Il-Qari FCR Z tal-cash register fiskali

·         Id-dokumentazzjoni Doganali kollha dwar l-importazzjoni/l-esportazzjoni

·         Il-Fatturi tax-Xiri u tal-Bejgħ

·         Noti ta’ Debitu u Kreditu

·         Kotba tal-Flus Kontanti u Reġistri tal-Ispejjeż Żgħar

·         Ktieb tax-Xiri u l-Bejgħ tal-Ġurnata

·         Kont tat-Taxxa fuq il-Valur Miżjud u Kont tal-VAT Annwali

·         Kont Bankarju marbut man-negozju

·         Kwalunkwe rekord u dokument ieħor rilevanti għall-attività ekonomika tiegħek

Inti obbligat li żżomm dawn ir-rekords u d-dokumenti għal sitt snin peress li d-Dipartiment jista’ jitlobhom għal spezzjoni.

Madankollu, f’każijiet fejn japplikaw id-dispożizzjonijiet għall-aġġustament tat-taxxa tal-input fuq oġġetti kapitali u fuq proprjetà immobbli, is-sitt snin għandhom jibdew jgħoddu mit-tmiem tal-perjodu ta’ ħames snin jew il-perjodu ta’ għoxrin sena rispettivament skont il-każ.

 

L-ispezzjonijiet mid-Dipartiment tal-VAT huma maħsuba biex:

·         Il-persuni rreġistrati jiġu edukati rigward id-drittijiet u l-obbligi tagħhom vis-a-vis il-VAT;

·         Jiġi ċċekkjat l-obbligu tat-taxxa ta’ persuna rreġistrata biex jiġi żgurat li l-ammont it-tajjeb ta’ taxxa qed jinġabar u jintbagħat lid-Dipartiment;

·         Jiġu eżaminati u vverifikati t-talbiet għar-rifużjonijiet magħmula minn persuni rreġistrati;

·         Jiġi eżerċitat kontroll fuq l-attività kummerċjali ta’ persuni rreġistrati billi jiġu eżaminati r-rekords tan-negozju u l-kotba tal-kontijiet tagħhom biex jiġi żgurat li ma tkun qed issir l-ebda sottodikjarazzjoni tat-taxxa tal-output u/jew dikjarazzjoni żejda tat-taxxa tal-input;

·         Isiru kontrolli fuq il-post fl-istabbilimenti tal-persuna rreġistrata biex jiġi żgurat li qed jinħarġu l-irċevuti fiskali lill-klijenti mal-bejgħ ta’ prodott/servizz.

 

Dażgur li tista’ tikkuntattja lill-Ispettur tal-VAT biex tiftiehmu fuq appuntament f’jum konvenjenti għat-tnejn li intom. Madankollu, ma tistax tirrifjuta li tilqa’ lill-Ispettur peress li dan huwa kuntrarju għal-liġi.

Għandek tkun taf ukoll li l-ispettur tal-VAT jista’ jitlob lil kwalunkwe persuna biex tipproduċi, jew jista’ jieħu mingħand kwalunkwe persuna, inkluża parti terza, ir-rekords, id-dokumenti, il-kontijiet u d-data elettronika meħtieġa li tinżamm minnha u jagħmel kopji tagħhom.

 

L-Ispettur tal-VAT huwa obbligat fi tmiem żjara, li jiddiskuti dawk l-oqsma ta’ nuqqas ta’ qbil miegħek. Jekk in-nuqqas ta’ qbil jibqa’ jippersisti u fl-opinjoni tal-Ispettur tal-VAT, l-iżbalji tiegħek irriżultaw f’taxxa sottodikjarata jew f’VAT tal-input iddikjarata żżejjed, id-Dipartiment jipproċedi biex jagħmillek “Stimi Provviżorji”.

Meta tirċievi avviż ta’ “Stima Provviżorja” tista’, jekk tkun trid, tirreġistra fi żmien 30 jum, “Talba għal Reviżjoni” mad-Dipartiment fejn tiddikjara b’mod preċiż u speċifiku r-raġunijiet tiegħek għan-nuqqas ta’ qbil.

Din it-“Talba għal Reviżjoni” tiġi pproċessata minn Uffiċjal tar-Reviżjoni li wara li jwettaq il-verifiki meħtieġa jista’ jikkanċella, jaġġusta jew jikkonferma l-istima provviżorja.

 

Sabiex ikun validu, appell kontra stima sottomessa lit-Tribunal ta’ Reviżjoni Amministrattiva jrid jissodisfa l-kriterji li ġejjin:

·         dikjarazzjoni għall-perjodu tat-taxxa li għalih tirreferi l-istima tkun ingħatat lill-Kummissarju qabel ma jiġi ppreżentat l-appell;

·         it-taxxa kollha pagabbli mill-appellant li ma tkunx qed tiġi kkontestata tkun tħallset;

·         isir fi żmien tletin jum mid-data tan-notifika tal-avviż li kontrih isir l-appell;

·         isir f’dik il-forma u b’dak il-mod li jista’ jiġi preskritt skont l-Att dwar il-Ġustizzja Amministrattiva;

·         sar pagament ta’ tali tariffi għall-preżentata ta’ appell kif jista’ jiġi preskritt skont l-Att dwar il-Ġustizzja Amministrattiva.

 

Is-servizzi li jsiru lil membri ta’ organizzazzjonijiet mingħajr skop ta’ qligħ huma eżentati mingħajr kreditu u l-organizzazzjoni mhijiex meħtieġa tirreġistra għall-VAT.

Madankollu, meta l-organizzazzjoni tipprovdi servizzi oħra bi ħlas, kull provvista tkun trid tiġi kkunsidrata fil-kuntest tal-leġiżlazzjoni tal-VAT.

Dawn li ġejjin huma xi eżempji fejn organizzazzjoni mingħajr skop ta’ qligħ tkun meħtieġa tirreġistra mad-Dipartiment, u soġġett għad-dritt u l-għażla tagħha li tiġi kklassifikata bħala persuna eżentata, titlob u tiġbor il-VAT:

·         tħaddem bar għall-membri tagħha

·         tikri spazju lil partijiet terzi biex jintuża bħala bar

·         tbigħ spazju għar-reklamar fir-rivista tagħha

·         Tagħmel attivitajiet ta’ ġbir ta’ fondi, ħlief jekk il-benefiċjarju ta’ attivitajiet bħal dawn ikun istituzzjoni tas-saħħa, soċjali jew edukattiva. F’każijiet bħal dawn ikun irid jinġieb il-permess tad-Dipartiment minn qabel għall-eżenzjoni.

Jekk organizzazzjoni mingħajr skop ta’ qligħ tkun meħtieġa tirreġistra mad-Dipartiment u ma tagħżilx li tiġi kklassifikata bħala persuna eżentata, id-dritt tagħha li titlob taxxa tal-input ikun limitat għall-provvisti li fuqhom tinġabar il-VAT, jew billi tattribwixxi direttament l-inputs tagħha jew billi tattribbwixxi parzjalment tali inputs.

 

Bħala regola ġenerali l-persuni kollha rreġistrati jridu jagħtu rendikont tal-VAT fuq il-bażi ta’ fattura (dovuti). Madankollu, id-Dipartiment jista’ jagħti struzzjonijiet li l-kontabbiltà għall-VAT għall-fornituri li ġejjin issir fuq il-bażi ta’ flus kontanti:

·         Bejjiegħa bl-imnut.

·         Provvisti minn kuntratturi tal-inġinerija ċivili, mekkanika u elettrika.

Il-provvisti ta’ servizzi professjonali fejn il-persuna li tipprovdi dawk is-servizzi jkollha warrant maħruġ skont kwalunkwe liġi fis-seħħ f’Malta biex tipprattika dik il-professjoni għandhom jagħtu rendikont tal-VAT fuq bażi ta’ flus kontanti. Sabiex jagħtu rendikont tal-VAT fuq il-bażi ta’ fattura, il-persuni li jipprovdu tali servizzi jridu jitolbu awtorizzazzjoni bil-miktub mid-Dipartiment.

Meta persuna rreġistrata tagħti rendikont tal-VAT fuq bażi ta’ flus kontanti tali kontabbiltà trid issir fir-rigward ta’ provvisti magħmula lilha u provvisti magħmula minnha.

 

Meta qridt il-fatturi tiegħek ipperikolajt serjament il-pretensjoni tiegħek għall-VAT tal-Input peress li l-VAT tal-Input tista’ tkun permessa biss jekk tkun appoġġata minn fattura tat-taxxa valida. Jekk ma jiġux ippreżentati fatturi tat-taxxa validi għall-ispezzjoni mid-Dipartiment, issir stima biex tiġi annullata l-pretensjoni tiegħek għall-VAT tal-Input.

 

Dan l-aħħar bdilt id-dar u biddilt il-Karta tal-Identità tiegħi kif suppost. Kelli l-impressjoni li d-Dipartiment tal-Karti tal-Identità kien se jinforma lid-Dipartiment tal-VAT dwar il-bidla fl-indirizz tiegħi, iżda bqajt nirċievi d-dikjarazzjonijiet tat-taxxa tiegħi fl-indirizz il-qadim. X’inhi l-proċedura li wieħed għandu jsegwi f’dawn il-każijiet?

Il-persuni rreġistrati huma meħtieġa jinfurmaw lid-Dipartiment bi kwalunkwe bidla, inkluż bidla fl-indirizz, bidliet fid-dettalji li jidhru fuq l-applikazzjoni għar-reġistrazzjoni u l-waqfien jew it-trasferiment tan-negozju jew parti minnu, fi żmien ħmistax-il jum minn dik il-bidla.

 

L-informazzjoni pprovduta fit-tweġibiet għandha sservi biss bħala gwida u m’għandha l-ebda saħħa legali.