Linji Gwida tat-Taxxa dwar Impjieg Kwalifikanti f’Attivitajiet Marittimi u l-Attivitajiet tal-Industrija tas-Servizzjar taż-Żejt u l-Gass Offshore

INWETTQU T-TRASFORMAZZJONI

Freephone
għaċ-ċittadini

153

Numru tat-telefown
għan-negozji

144

Linji Gwida tat-Taxxa dwar Impjieg Kwalifikanti f’Attivitajiet Marittimi u l-Attivitajiet tal-Industrija tas-Servizzjar taż-Żejt u l-Gass Offshore

Sfond

Is-Settur marittimu huwa attur sinifikanti fl-iżvilupp ekonomiku lokali. Is-settur tal-baħar u dak marittimu jikkontribwixxu għal 14.7 fil-mija tal-PDG lokali, u din iċ-ċifra hija prevista li tiżdied għal 18 fil-mija sal-2039. Kważi 25 fil-mija tal-ħaddiema lokali (kważi 40,000 persuna) huma impjegati fis-setturi tat-turiżmu kostali, tal-isports tal-ilma, tat-tbaħħir u tas-sajd. Iktar minn 1,500 bastiment merkantili jtajru l-bandiera Maltija, bir-reġistru Malti jikklassifika bħala wieħed mill-akbar fl-Ewropa u fid-dinja. Il-leġiżlazzjoni l-ġdida tat nifs ġdid lill-industrija marittima ta’ Malta u l-pajjiż ilu jibni b’mod kostanti grupp ta’ servizzi marittimi.

L-objettiv tar-Regoli tal-2018 dwar Impjieg Kwalifikanti f’Attivitajiet Marittimi u l-Attivitajiet tal-Industrija tas-Servizzjar taż-Żejt u l-Gass Offshore (Taxxa Personali) (A.L.140 tal-2018) huwa li jagħtu viżjoni fit-tul lis-settur sabiex l-operazzjonijiet meħtieġa jiġu mgħammra b’mod adegwat bil-ħiliet meħtieġa u jiġu kkontrollati l-limitazzjonijiet iffaċċjati minħabba d-disponibbiltà limitata ta’ riżorsi umani.

Impjiegi u Karigi Eliġibbli, jinkludu l-pożizzjonijiet li ġejjin:

Attivitajiet Marittimi
Uffiċjal Kap Eżekuttiv
Uffiċjal Kap tal-Operazzjonijiet
Direttur Maniġerjali
Uffiċjal Kap Finanzjarju
Maniġer Ġenerali
Maniġer tal-Ekwipaġġ
Maniġer Tekniku
Superintendent Tekniku tal-Bastiment
Persuna Maħtura fuq l-Art
Kaptan
Chief Mate
It-Tieni Uffiċjal
Kap Inġinier
It-Tieni Inġinier
Kok

Attivitajiet tal-Industrija tas-Servizzjar taż-Żejt u l-Gass Offshore u Servizzi Anċillari

Uffiċjal Kap Eżekuttiv
Uffiċjal Kap Operattiv
Kap tal-Akkademja tat-Taħriġ (liema Akkademja trid tiġi ċċertifikata minn istituzzjoni ta’ akkreditazzjoni internazzjonali).

Kundizzjonijiet għall-Eliġibbiltà

Ir-regoli daħlu fis-seħħ b’effett mill-1 ta’ April 2018 u japplikaw għal introjtu taxxabbli fis-sena ta’ stima 2017 (sena bażi 2016), fir-rigward ta’ karigi eliġibbli fl-industrija tas-Servizzjar taż-Żejt u l-Gass Offshore u servizzi anċillari u mis-sena ta’ stima 2018 fir-rigward ta’ karigi eliġibbli fl-Attivitajiet Marittimi. Ir-regoli japplikaw għal individwi mhux domiċiljati f’Malta.

Ir-Regoli tal-2018 dwar Impjieg Kwalifikanti f’Attivitajiet Marittimi u l-Attivitajiet tal-Industrija tas-Servizzjar taż-Żejt u l-Gass Offshore (Taxxa Personali) huma programm li jippermetti lill-impjegati anzjani involuti fl-industrija marittima u taż-żejt u l-gass jibbenefikaw minn rata fissa ta’ 15% taxxa fuq l-introjtu mill-impjieg derivat fir-rigward ta’ xogħol jew doveri mwettqa f’Malta.

Kundizzjonijiet Applikabbli Ewlenin

il-persuna trid tkun impjegata biex timla pożizzjoni għolja (jew biex twettaq attivitajiet ekwivalenti) u tkun fil-pussess ta’ kwalifiki professjonali jew esperjenza professjonali aċċettabbli;
tkun intitolata għal remunerazzjoni ta’ mill-inqas €65,000 għas-sena bażi 2018 (eskluż il-valur annwali ta’ kwalunkwe perkaċċ) taħt kuntratt ta’ impjieg;
tirrisjedi f’akkomodazzjoni meqjusa bħala normali għal familja komparabbli f’Malta;
ma tkunx domiċiljata f’Malta;
tkun fil-pussess ta’ dokument tal-ivvjaġġar validu;
tkun fil-pussess ta’ assigurazzjoni tas-saħħa adegwata;
ma tibbenefika mill-ebda inċentiv alternattiv disponibbli f’Malta;
tkun iffirmat Kuntratt ta’ Impjieg Kwalifikanti.

Kuntratt ta’ Impjieg Kwalifikanti

il-persuna tikseb introjtu mill-impjieg soġġett għat-taxxa fuq l-introjtu f’Malta;
ikollha kuntratt ta’ impjieg soġġett għal-liġijiet ta’ Malta u turi għas-sodisfazzjon tal-Awtorità għat-Trasport f’Malta li l-kuntratt huwa mfassal għall-eżerċizzju ta’ xogħol ġenwin u effettiv f’Malta;
turi għas-sodisfazzjon tal-Awtorità għat-Trasport f’Malta li għandha kwalifiki professjonali u għandha esperjenza professjonali;
tiżvela b’mod sħiħ għall-finijiet tat-taxxa u tiddikjara l-emolumenti riċevuti fir-rigward ta’ introjtu minn kuntratt ta’ impjieg kwalifikanti u kull introjtu riċevut minn persuna relatata mal-impjegatur li tħallas introjtu minn kuntratt kwalifikanti bħala taxxabbli f’Malta;
turi għas-sodisfazzjon tal-Awtorità għat-Trasport f’Malta li twettaq attivitajiet ta’ Impjieg u Kariga Eliġibbli.

Il-kariga eliġibbli hija impjieg inkluż fil-lista ta’ hawn fuq u li jkun ma’ xi waħda minn dawn li ġejjin:

kwalunkwe impriża li jkollha Dokument ta’ Konformità (DOC) maħruġ skont il-Kodiċi Internazzjonali tal-Ġestjoni tas-Sikurezza (ISM) jew Liċenzja tas-Servizzi għar-Reklutaġġ u l-Kollokament tal-Baħħara maħruġa skont il-Konvenzjoni dwar ix-Xogħol Marittimu, 2006; jew
kwalunkwe impriża li timpjega lill-individwu partikolari għal xogħol abbord kwalunkwe vapur, esklużi vapuri li joperaw fuq servizzi regolari kif ukoll vapuri li l-użu jew l-operat tagħhom jeħtieġ ċertifikazzjoni skont ir-Regolamenti dwar il-Bastimenti Kummerċjali u li jkunu rmiġġati jew ankrati fl-ilmijiet territorjali ta’ Malta jew fi kwalunkwe port f’Malta għal mill-inqas perjodu ta’ xahar f’sena kalendarja; jew
kwalunkwe impriża li twettaq prinċipalment kummerċ jew negozju li jikkonsisti fis-Servizzjar tal-industrija taż-żejt u l-gass offshore u s-servizzi anċillari.

Applikazzjoni

Għandha ssir applikazzjoni għad-determinazzjoni formali tal-eliġibbiltà lir-Reġistratur Ġenerali tat-Tbaħħir u l-Baħħara, Transport Malta permezz ta’ din il- Formola.

Il-benefiċċju jiġi eżerċitat għal kull sena ta’ stima permezz ta’ dikjarazzjoni magħmula fuq il- Formola RA 29 iffirmata mill-benefiċjarju u approvata minn Transport Malta. Il-Formola ladarba tiġi approvata minn Transport Malta għandha tiġi mehmuża mad-Dikjarazzjoni tat-Taxxa fuq l-Introjtu u sottomessa lill-Uffiċċju tal-Kummissarju tat-Taxxa sad-data ta’ skadenza tad-dikjarazzjoni tat-taxxa.

my account

The form was submitted successfully!