Strateġija u Innovazzjoni

Ġestjoni tal-Programmi, Edukazzjoni u Taħriġ, u Komunikazzjoni

Il-funzjonijiet tal-Ġestjoni tal-Programmi, Edukazzjoni u Taħriġ, u Komunikazzjoni jiffurmaw parti integrali mid-Diviżjoni tal-Istrateġija u l-Innovazzjoni fi ħdan l-Amministrazzjoni tat-Taxxa u d-Dwana ta’ Malta (MTCA), u jappoġġjaw l-impenn tal-organizzazzjoni lejn l-eċċellenza, l-innovazzjoni u l-involviment attiv tagħhom. Il-funzjoni tal-Ġestjoni tal-Programmi hija responsabbli mis-superviżjoni, il-koordinazzjoni u l-monitoraġġ tal-programmi u l-inizjattivi strateġiċi tal-MTCA, sabiex tiżgura li dawn jitwettqu fil-ħin, b’mod effettiv u skont l-objettivi stabbiliti. Permezz ta’ segwitu kontinwu u governanza strutturata, din il-funzjoni tikkontribwixxi b’mod dirett għas-suċċess organizzattiv u għat-twettiq tal-prijoritajiet ewlenin tal-Amministrazzjoni. Il-funzjoni tal-Edukazzjoni u t-Taħriġ tiffoka fuq it-tisħiħ tal-għarfien dwar it-taxxa u d-dwana permezz ta’ inizjattivi edukattivi u ta’ sensibilizzazzjoni mmirati lejn il-pubbliku, b’enfasi partikolari fuq iż-żgħażagħ. Billi tippromwovi fehim akbar tal-importanza tat-taxxa u tal-kontribut tagħha għas-servizzi pubbliċi u l-iżvilupp nazzjonali, din il-funzjoni tgħin biex tissaħħaħ kultura ta’ responsabbiltà ċivika u konformità. Fl-istess waqt, tipprovdi opportunitajiet kontinwi ta’ tagħlim għall-impjegati permezz ta’ programm annwali ta’ taħriġ li jinkludi kemm kompetenzi tekniċi kif ukoll ħiliet personali u professjonali. Il-funzjoni tal-Komunikazzjoni taġixxi bħala l-vuċi u l-punt ewlieni ta’ kuntatt tal-MTCA, billi tibni u ssaħħaħ relazzjonijiet ta’ fiduċja bejn l-Amministrazzjoni, l-impjegati tagħha, il-partijiet interessati u l-komunità inġenerali. Permezz ta’ komunikazzjoni strateġika u mmirata, hija tippromwovi t-trasparenza, issaħħaħ il-fiduċja tal-pubbliku u tkabbar l-għarfien dwar ir-rwol u s-servizzi tal-MTCA. Il-funzjoni tmexxi l-ġestjoni tal-identità u r-reputazzjoni tal-organizzazzjoni fuq diversi pjattaformi, inklużi l-pjattaformi diġitali, il-midja soċjali, il-websajt korporattiva u l-komunikazzjoni interna. Tmexxi wkoll kampanji ta’ informazzjoniattivitajiet u avvenimenti interni u esterni, tikkordina l-involviment tal-partijiet interessati u tiżgura li l-messaġġi tal-MTCA jiġu kkomunikati b’mod ċar, konsistenti u effettiv. B’dan il-mod, il-funzjoni tal-Komunikazzjoni tgħin biex l-MTCA tibqa’ organizzazzjoni aċċessibbli, moderna u qrib in-nies li taqdi.

Data Management

Id-Data Management Unit (DMU) tal-MTCA hija mfassla biex tappoġġja l-għanijiet tal-MTCA billi timmaniġġja d-data bħala assi strateġiku, u tiżgura li tkun preċiża, immexxija minn governanza xierqa, u disponibbli b’mod faċli biex tappoġġja teħid ta’ deċiżjonijiet infurmati madwar l-organizzazzjoni. Lil hinn minn dawn ir-responsabbiltajiet ewlenin, id-Data Management Unit għandha rwol usa’ fl-għajnuna lill-MTCA biex tieħu deċiżjonijiet aktar effettivi dwar il-konformità u l-politika permezz ta’ data u evidenza affidabbli. It-tim jappoġġja wkoll l-adozzjoni ta’ prattiki moderni relatati mad-data u t-teknoloġija, u jaħdem mill-qrib ma’ dipartimenti oħra biex jiżgura li d-data tintuża b’mod konsistenti madwar l-MTCA. Billi tippermetti deċiżjonijiet aktar infurmati u kollaborazzjoni aktar mill-qrib fl-organizzazzjoni kollha, id-Data Management Unit tgħin lill-MTCA twettaq amministrazzjoni tat-taxxa ġusta u effettiva

Awditjar Intern

Id-Direttorat tal-Awditjar Intern jipprovdi assigurazzjoni indipendenti dwar l-effettività tas-sistemi ta’ governanza, ġestjoni tar-riskju u kontroll intern tal-MTCA. Id-Direttorat jevalwa l-proċessi u l-kontrolli madwar l-organizzazzjoni, jippromwovi r-responsabbiltà u l-governanza tajba, u jidentifika opportunitajiet biex tissaħħaħ l-effettività operattiva u l-konformità. Permezz tal-ħidma tiegħu, l-Awditjar Intern jappoġġja lill-MTCA fit-twettiq tal-objettivi tagħha, filwaqt li jħares ir-riżorsi pubbliċi u jrawwem kultura ta’ integrità u titjib kontinwu.

Maniġġjar tar-Riskju

Id-Direttorat tal-Immaniġġjar tar-Riskju għandu rwol ċentrali fl-appoġġ tal-objettivi strateġiċi u operattivi tal-MTCA permezz tal-identifikazzjoni, il-valutazzjoni, il-monitoraġġ u l-mitigazzjoni tar-riskji li jistgħu jaffettwaw il-prestazzjoni tal-Amministrazzjoni u l-funzjonijiet tagħha fil-ġbir tad-dħul. Id-direttorat jiżviluppa u żżomm oqfsa ta’ ġestjoni tar-riskju fuq livell organizzattiv, jikkoordina valutazzjonijiet tar-riskju bejn id-diversi oqsma operattivi, u jippromwovi kultura ta’ għarfien u ġestjoni tar-riskju madwar l-organizzazzjoni kollha. Permezz tal-użu ta’ analitika tad-data, intelligenza u metodoloġiji ta’ Compliance Risk Management (CRM), id-direttorat jappoġġja teħid ta’ deċiżjonijiet infurmati, issaħħaħ ir-reżiljenza organizzattiva u jikkontribwixxi għal interventi ta’ konformità aktar effettivi u mmirati. Permezz ta’ monitoraġġ u rapportar kontinwu, dan id-direttorat jgħin sabiex ir-riżorsi tal-MTCA jkunu diretti lejn l-oqsma li jippreżentaw l-akbar riskju u opportunitajiet.