Dipartiment tal-Affarijiet Legali, Tekniċi u Internazzjonali

Id-Dipartiment tal-Affarijiet Legali, Tekniċi u Internazzjonali għandu tliet funzjonijiet ewlenin imqassma fost id-Direttorati tiegħu. Dan id-dipartiment huwa responsabbli mill-abbozzar u l-interpretazzjoni tal-leġiżlazzjoni tat-taxxa u jagħti wkoll pariri lid-Dipartimenti, l-Aġenziji u l-Awtoritajiet tal-Gvern dwar kwistjonijiet ta’ tassazzjoni domestiċi u internazzjonali. Jimmonitorja l-iżviluppi rilevanti fl-oqsma lokali u internazzjonali u jiżgura li l-prattiki amministrattivi u l-leġiżlazzjoni jikkontribwixxu għat-titjib tar-reputazzjoni u l-kompetittività ta’ Malta f’dawn l-oqsma. Jirrappreżenta wkoll l-Amministrazzjoni tat-Taxxa u tad-Dwana ta’ Malta (MTCA) fil-Qrati tal-Liġi.

Dan li ġej jipprovdi ħarsa ġenerali lejn ir-responsabbiltajiet ewlenin tad-Direttorati rispettivi.

Direttorati tat-Tassazzjoni Diretta u Indiretta

Dawn id-Direttorati huma primarjament responsabbli għall-kwistjonijiet kollha li jikkonċernaw il-leġiżlazzjoni tat-taxxa b’mod ġenerali, inkluż l-abbozzar ta’ leġiżlazzjoni tat-taxxa ġdida (inklużi emendi għal-liġi tat-taxxa eżistenti) u l-interpretazzjoni ta’ tali leġiżlazzjoni bil-ħsieb li jiddaħħlu fis-seħħ il-politiki tal-Ministeru tal-Finanzi. Ikunu involuti f’negozjati fil-livell tal-UE dwar inizjattivi ġodda, billi jinvolvu ruħhom b’mod proattiv f’diversi fora li jindirizzaw il-futur tat-tassazzjoni kif ukoll kwistjonijiet emerġenti u topiċi li jikkonċernaw it-tassazzjoni. Huma responsabbli wkoll biex jittrattaw kwistjonijiet tekniċi relatati mal-leġiżlazzjoni tat-taxxa kif jista’ jkun meħtieġ mill-partijiet interessati interni u esterni, inkluż l-abbozzar ta’ linji gwida, u l-ġestjoni ta’ proġetti li jikkonċernaw it-taxxi.

Direttorat għall-Kooperazzjoni Internazzjonali

Dan id-Direttorat jaġixxi bħala l-Uffiċċju Ċentrali ta’ Kollegament (Central Liaison Office – CLO) fir-rigward tal-impenji ta’ Malta b’rabta mal-iskambju ta’ informazzjoni u forom oħra ta’ kooperazzjoni fiskali skont id-Direttivi tal-UE u strumenti/standards internazzjonali oħra, inklużi trattati fiskali. Is-CLO għandu s-setgħat legali u l-awtorità kollha meħtieġa biex jaġixxi f’isem l-Awtorità Kompetenti ta’ Malta, b’din tal-aħħar tkun il-punt ċentrali ta’ kuntatt għall-awtoritajiet tat-taxxa barranin li jixtiequ jiskambjaw informazzjoni mal-amministrazzjoni tat-taxxa Maltija. Il-kooperazzjoni abbażi ta’ strumenti internazzjonali sseħħ prinċipalment taħt żewġ kategoriji:

1. L-iskambju ta’ informazzjoni fuq talba, fejn Awtorità Kompetenti f’ġuriżdizzjoni waħda titlob informazzjoni minn Awtorità Kompetenti oħra f’ġuriżdizzjoni differenti; u
2. L-iskambju awtomatiku ta’ kategoriji ta’ informazzjoni stabbiliti minn qabel ma’ Awtoritajiet Kompetenti oħra f’ġuriżdizzjonijiet differenti.

Dan id-Direttorat jimmonitorja l-iżviluppi fil-qasam tat-taxxa fl-UE u f’fora internazzjonali oħra, sabiex jiżgura li Malta tkompli tikkonforma mal-istandards miftiehma ta’ kooperazzjoni fiskali.

Oġġezzjonijiet u Appelli

Dan id-Direttorat għandu l-kompitu li jsolvi t-tilwim bejn il-kontribwenti u l-MTCA b’mod effiċjenti. Huwa –

• jittratta talbiet għal oġġezzjonijiet tat-taxxa fuq l-introjtu u għal reviżjonijiet tal-VAT ippreżentati mill-kontribwenti wara valutazzjonijiet maħruġa mill-MTCA,
• jittratta l-litigazzjoni bejn il-kontribwenti u l-MTCA quddiem il-Qrati ta’ Malta u Għawdex b’rabta ma’ kull tip ta’ taxxa,
• jgħin fil-prosekuzzjoni kriminali ta’ reati kontra l-Atti dwar id-Dħul, u
• jittratta t-tilwim l-ieħor kollu li jinvolvi l-MTCA.