Proċeduri ta’ Ftehim Reċiproku

Kontribwent jista’ jikkunsidra li l-azzjonijiet ta’ ġurisdizzjoni waħda jew it-tnejn li huma jirriżultaw jew se jirriżultaw għalih f’tassazzjoni mhux skont id-dispożizzjonijiet tat-trattat. Irrispettivament mir-rimedji pprovduti mil-liġi domestika tal-ġurisdizzjonijiet involuti, huwa jista’ jippreżenta l-każ tiegħu lil Awtorità Kompetenti nnominata ta’ waħda jew it-tnejn mill-ġurisdizzjonijiet.

L-Awtorità Kompetenti li tirċievi talba bħal din għandha tagħmel ħilitha, jekk l-oġġezzjoni tidher li hija ġġustifikata u jekk hija stess ma tkunx tista’ tasal għal soluzzjoni sodisfaċenti, biex issolvi l-każ permezz ta’ ftehim reċiproku mal-Awtorità Kompetenti tal-ġurisdizzjoni l-oħra, bil-għan li tiġi evitata t-tassazzjoni li ma tkunx skont il-Konvenzjoni.

Każ MAP huwa possibbli skont id-dispożizzjonijiet tal-artiklu tal-MAP f’termini ta’:

• Ftehim ta’ tassazzjoni doppja;

• Il-Konvenzjoni tat-23 ta’ Lulju 1990 dwar l-eliminazzjoni tat-tassazzjoni doppja b’rabta mal-aġġustament tal-profitti ta’ intrapriżi assoċjati (90/463/KEE) - Il-Konvenzjoni ta’ Arbitraġġ tal-UE;
  
• Il-Mekkaniżmu tal-Unjoni Ewropea għas-Soluzzjoni tat-Tilwim (id-Direttiva 2017/1852 tal-10 ta’ Ottubru 2017) ("DRM") li ġiet trasposta għal-liġi Maltija permezz tar-Regolamenti li Jimplimentaw id-Direttiva dwar Mekkaniżmi għas-Soluzzjoni tat-Tilwim dwar it-Taxxa fl-Unjoni Ewropea (L.S. 123.191).

Każ MAP huwa possibbli għal tilwim bilaterali u multilaterali u jista’ jittratta talbiet għal riżoluzzjoni ta’ diversi snin ta’ kwistjonijiet rikorrenti. Il- Linji Gwida dwar il-Proċedura ta’ Ftehim Reċiproku jipprovdu aktar dettalji dwar kif tali MAP tista’ tiġi pproċessata f’termini ta’ ftehim dwar it-tassazzjoni doppja u n-nota ta’ Gwida dwar ir-Regolamenti dwar il-Mekkaniżmu għas-Soluzzjoni tat-Tilwim tipprovdi aktar dettalji dwar kif Ilment jista’ jiġi pproċessat f’termini ta’ Lment ippreżentat f’termini tal-Mekkaniżmu Ewropew għas-Soluzzjoni tat-Tilwim.